لاہور(پاکستان پوائنٹ نیوز27۔دسمبر2017ء) پاکستان کرکٹ بورڈ دے چیئرمین نجم سیٹھی دا کہنا اے کہ پاکستان آؤندے ورھے بھارت و چ شیڈول ایشیا کپ وچ رلت توں انکار کر سکدا اے۔ میڈیا نال گل بات کردے ہوئے نجم سیٹھی دا کہنا سی کہ ایمرجنگ ایشیا کپ دی مخالفت مگروں پاکستان وی آؤندے ورھے بھارت وچ شیڈول کپ وچ رلت توں انکار کرن دا حق رکھدا اے۔ اوہناں دا کہنا سی کہ ایشین کرکٹ کونسل تے سری لنکن کونسل دے صدر تھیلنگا سما تھیپالا نے اکتوبر وچ بھارت تے بنگلا دیشی کرکٹ بورڈ نوں راضی کرن دی کوشش کیتی کہ اوہناں نوں وی لاہور وچ ایشین کرکٹ کونسل دے اجلاس وچ رلت کرنی چاہیدی پر اوہ نہیں آئی جہدے مگروں کمیٹی نے ایہ ایونٹ پاکستان وچ کروان دی منظوری دے دتی۔
نجم سیٹھی مطابق اوہناں نے ایہ نکتہ چُکیا کیونکہ بی سی بی آئی نوں ایشیا کپ وچ پاکستان دی رلت لئی اپنی حکومت توں اجازت لینی ہوئے گی تے ساڈے کول وی ایس ایونٹ وچ رلت توں انکار دا اختیار اے کیونکہ سانوں وی اپنی حکومت توں اجازت چاہیدی ہوئے گی۔ نجم سیٹھی مطابق کونسل دے ہور ممبراں نے ایس فیصلے لئی ویلا منگیا اے تے اگلی میٹنگ وچ ایہدے اُتے فیر گل ہوئے گی۔
