لاہور(پاکستان پوائنٹ نیوز13۔دسمبر2017ء) کرکٹ دا کھیڈ اُنج تے کئی دہاکیاں توں کھیڈیا جا رہیا اے پر جے کمائی دی گل کرئیے تے ایہدا فٹبال تے باسکٹ بال نال دور دور تیکر کوئی مقابلا نظر نہیں آؤندا، جے اسیں دنیا دے سبھ توں ودھ کمان والے کھڈاریاں نال جُڑے لوکاں دی لسٹ بنائیے تے ٹاپ 10وچ صرف اک کرکٹر شامل اے پر دنیا بھر وچ آئی پی ایل، پی ایس ایل، تے بگ بیش ورگیاں ٹی ٹونٹی لیگز دے آؤن مگروں ہن کرکٹرز دی کمائی وچ وی وادھا ہو گیا اے۔
کُجھ مہینے پہلاں ای کرکٹ وچ 10اوورز دا فارمیٹ وی شامل کیتا گیا اے جو 14دسمبر توں 17دسمبر تیکر شارجہ وچ کھیڈیا جائے گا، ایس لیگ وچ شاہد آفریدی، مصباح الحق، کمار سنگاکار تے وریندر سہواگ توں وکھ ہور سٹار وی ایکشن وچ وکھالی دین گے۔ لیگ نوں دنیا بھر وچ مشہور کروان لئی اک مقامی اماراتی کنسٹرکشن کمپنی نے اعلان کیتا اے کہ ایس فارمیٹ وچ سنچری کرن والے کھڈاری نوں 500,000درہم یاں تقریبن 15ملین رُپئے مالیت دا سٹوڈیو اپارٹمنٹ انعام وچ دتا جائے گا جدکہ گھڑیاں بنان والی مشہور عالمی کمپنی نے ایس لیگ وچ ففٹی کرن والے کھڈاریاں لئی 4.6ملین رُپئے مالیت دی گھڑی تحفے دے طور اُتے دین اعلان کیتا اے۔
