بہتیاں ٹی ٹونٹی سنچریاں: احمد شہزادہ‘ ویرات کوہلی دے برابر تے ڈیویلیئرزتوں اگانہ نکل گئے

راولپنڈی(پاکستان پوائنٹ نیوز30۔نومبر2017ء) قومی ٹیم دے اوپنر احمد شہزاد نیشنل ٹی ٹونٹی دے دوجے سیمی فائنل دوران ایس فارمیٹ وچ بُہتیاں سنچریاں کرن والیاں دی لسٹ وچ ویرات کوہلی دے برابر جدکہ سابق جنوبی افریقی کپتان اے بی ڈویلیئرز توں اگانہ نکل گئے۔ 26ورھیاں دے احمد شہزاد نے لاہور بلیوز دی نمائندگی کردے ہوئے فاٹا خلاف صرف 57گینداں اُتے اپنی چوتھی ٹونٹی ٹونٹی سنچری پوری کیتی، جہدے نال ای اوہ ایس فارمیٹ وچ سبھ توں ودھ سنچریاں بنان وچ مختار احمد تے کامران اکمل توں اگانہ نکل گئے نیں۔

احمد شہزاد نے اننگز وچ 13چوکے اتے 2چھکے وی مارے تے 59گینداں اُتے 104کر کے ناٹ آؤٹ رہے۔چیتے رہوے کہ ٹونٹی ٹونٹی کرکٹ وچ بُہتیاں سنچریاں سکور کرن دا اعزاز کرس گیل کول اے جہناں نے 10سنچریاں کیتیاں نیں۔ برینڈن میکولم، لیوک رائٹ تے مائیگل کلنز 7,7سنچریاں نال دوجے، ڈیوڈ وارنر چھ سنچریاں نال تیجے، ڈووین سمتھ پنج سنچریاں نال چوتھے،ویرات کوہلی ہیملٹن مساکاڈزا‘ جسین روئے تے ہن احمد شہزاد 4,4سنچریاں سکور کرن والے کھڈاری دی لسٹ وچ 5ویں نمبر اُتے آ گئے نیں۔