دبئی(پاکستان پوائنٹ نیوز26۔ستمبر2017ء) تِنوں فارمیٹس وچ قومی کرکٹ ٹیم دی قیادت کرن دا اعزاز اپنے ناں کرن والے وکٹ کیپر و بیسٹمین سرفراز احمد نے پاک بھارت مقابلیاں دی حمایت کردے ہوئے آکھیا اے کہ دوویں ملکاں دے لوک روایتی حریفاں نوں فیر مقابلے وچ ویکھنا چاہندے نیں۔ تفصیل مطابق پاکستانی کپتان نوں امارات وچ موجود اک بھارتی ادارے نے پاکستانی مارکیٹ لئی اپنا برانڈ ایمبیسڈر متھیا اے۔
ایس موقعے تے سرفراز احمد دا کہنا سی کہ ادارے دی ایس کوشش کارن آؤندے ویلے وچ پاکستان تے بھارت دے تعلقات وچ بہتری آئے گی تے دوویں ملکاں وچکار اک وار فیر کرکٹ کھیڈن دا سلسلا شروع ہو جائے گا۔ امارات وچ مضبوط کاروباری حیثیت رکھن والے ادارے دا کرکٹ تے سرفراز احمد نال اوس ویلے دا ناطہ اے جدوں اوہ انٹرنیشنل کرکٹ وچ نہیں آئے سن تے اوہناں نوں امید اے ۔سرفراز احمد دا کہنا سی کہ دوویں ملکاں دے لوک روایتی حریفاں نوں میدان وچ کھیڈدا ویکھن لئی اُتاولے نیں تے اوہناں دی وی ذاتی خاہش اے کہ گوانڈھی ملکاں دے لوکاں وچکار دوستانہ تعلقات بحال ہون تے کرکٹ ایس حوالے نال اپنا کردار ادا کر سکدی اے۔
