دنیا مشورہ نہ دیوے ‘ مجمانی کیویں کرنی اے اسیں جاندے آں:سابق کپتان وسیم اکرم

لاہور(پاکستان پوائنٹ نیوز12۔ستمبر2017ء) قومی کرکٹ ٹیم دے سابق کپتان وسیم اکرم نے آکھیا اے کہ سانوں کسے دے مشورے دی لوڑ نہیں ‘ اسیں جاندے آں کہ ورلڈ الیون دی مجمانی کیویں کرنی اے۔ نجی ٹی وی نال گل بات کردے ہوئے اوہناں نے آکھیا کہ دنیا دے تجربے کار کھڈاری پاکستان وچ کرکٹ کھیڈن آئے نیں جدکہ ورلڈ الیون وچ ہاشم آملہ‘ عمران طاہر تے ہور کرکٹ دے وڈے وڈے ناں نیں۔ اوہناں نے آکھیا کہ سانوں خشی اے کہ پاکستان وچ انٹرنیشنل کرکٹ بحال ہو گئی اے۔ پر کسے نوں پاکستان نوں مشورہ دین دی لوڑ نہیں کہ مجمانی کیویں کرنی اے۔ وسیم اکرم نے آکھیا کہ ورلڈ الیون تے قومی ٹیم وچکار ہون والے میچاں وچ ہار جِت نال فرق نہیں پئے گا کیونکہ ایہ ایونٹ ای بہت وڈا اے۔