کراچی(پاکستان پوائنٹ نیوز15۔جولائی2017ء) آئی سی سی چیمپئنز ٹرافی دے فاتح کپتان سرفراز احمد نے بھارت خلاف فائنل میچ وچ کیدھار جادیو دی وکٹ ملن اُتے بہت پرجوش ہون تے حسن علی تے شاداب خان اُتے غصہ آن بارے دلچسپ انکشاف کیتا اے۔ تفصیل مطابق چیمپئنز ٹرافی دے فائنل وچ قومی بلے بازاں نے جتھے اپنی شاندار بیٹنگ نال بھارتی ٹیم نوں مشکل ٹارگٹ دتا اوتھے باﺅلراں نے وی چنگی باﺅلنگ کر کے ایہ میچ اوہناں توں کھوہ لیا سی۔
مڈھلے بلے بازاں دے آﺅٹ ہون مگروں کیدھار جادیو تے ہردیک پانڈیا نے مزاحمت کردے ہوئے میچ وچ واپس آن دی کوشش کیتی پر اوہ وی ناکام ہوئے تے جدوں کیدھار یادیو دی وکٹ ملی، اوس ویلے کپتان تے شاداب خان بڑے خش وکھالی دتے۔ ایس بارے جدوں اوہناں توں سوال کیتا گیا کہ اوہ عام طور اُتے اینے پرجوش نظر نہیں آئے پر کیدھار جادیو دی وکٹ ملن تے اجیہا ردعمل کیوں دتا گیا؟ جواب وچ اوہناں نے آکھیا کہ جدوں مڈل آرڈر بلے باز کیدھار جادیو کھیڈن آیا تے قومی باﺅلر شاداب خان تے حسن علی نے اوہناں نوں غیر ضروری گینداں کروائیاں جہدے کارن اوہ ڈاڈھے ناراض ہوئے۔
سرفراز احمد نے دسیا کہ جدوں کیدھار جادیو نے لگاتار دو چھکے مار تے ایس موقعے تے میچ دلچسپ ہو گیا سی پر جدوں اوہ صرف 9سکور بنا کے واپس گیا تے میں بہت ای خش ہویا تے انوکھے انداز وچ اوہدے آﺅٹ ہون دی خشی منائی۔
