نویں دِلی(پاکستان پوائنٹ نیوز17۔مئی2017ء) بگ تھری خلاف ووٹ دین اُتے پی سی سی آئی پاکستان دشمنی دیاں حداںپار کر گیا، پاکستان نوں ورلڈ کپ 2019وچ براہ راست کوالیفائی کرن توں روکن لئی ہن بھارتی کرکٹ بورڈ نے چیمپئنز ٹرافی وچ رلت مگروں ویسٹ انڈیز خلاف اوہناں دے ای دیس ون ڈے سیریز کھیڈن دا اعلان کر دتا۔ تفصیل دے مطابق بھارتی کرکٹ ٹیم چیمپئنز ٹرافی وچ رلت مگروں 23جون توں ویسٹ انڈیز خلاف اوہناں دے ای دیس وچ 5ون ڈے تے اک ٹی 20میچ کھیڈے گا، پہلے دو میچ پورٹ آف سپین، اگلے 2 اینٹیگا تے آخری ون ڈے تے اکلا ٹی ٹونٹی کنگسٹن، جمیکا وچ کھیڈیا جائے گا۔
آئی سی سی وچ 79پوائنٹس نال 9ویں نمبر اُتے موجود ویسٹ انڈیز اگلے مہینے افغانستان خلاف سیریز کھیڈے گا تے چیمپئنز ٹرافی توں باہر کیریبیئن سائیڈ نوں امید ااے کہ 8ویں نمبر اُتے موجود پاکستانی ٹیم ایونٹ وچ مَندی کارکردگی اُتے پوائنٹس گوا دیوے گی جہدا فائدا اوہنوں ہووے گا۔ وسیلیاں مطابق انٹرنیشنل شیڈول دی سختی کارن بھارت اپنے سٹار کھڈاریاں نوں آرام دین دا بہانا کر کے کمزور ٹیم وی ویسٹ انڈیز گھل سکدا اے جہدا سِدھا سِدھا فائدا کیریبئن سائیڈ نوں ہووے گا۔
