ڈومینیکا(پاکستان پوائنٹ نیوز13۔مئی2017ء) پاکستان کرکٹ بورڈ دے سربراہ شہریار خان دا کہنا اے کہ مصباح الحق نوں آئی سی سی میچ ریفری لئی مِتھنا چاہندے آں، اسیں ایس فیصلے دا اختیار آپ مصباح الحق نوں دتا اے۔ میڈیا نال گل بات کردے ہوئے چیئرمین پی سی بی دا کہنا سی کہ بیتے ویلے پاکستان دے بُہتے کرکٹرز آئی سی سی میچ ریفری نہیں بنے پر جے مصباح الحق ایس بارے رضا مندی دا وکھالا کرن تے اوہناں دی خشی ہووے گی۔
اوہناں دا کہنا سی کہ ایہ ہن پاکستان دے کامیاب ترین کپتان دا فیصلا ہووے گا کہ اوہ کمنٹری ول توجہ کردے نیں یاں اپنی چُپ طبیعت دے عین مطابق پی سی بی دی رائے دا احترام کردے ہوئے میچ ریفری بنن نوں ترجیح دیندے نیں۔چیتے رہوے کہ پاکستان لئی ہن تک ماجد خان، کرنل (ر) نوشاد، وسیم حسن راجا، نسیم الغنی، اظہر خان تے ویسٹ انڈیز وچ قومی ٹیم دے منیجر دے فرض نبھان والے طلعت علی ملک آئی سی سی ریفری دی حیثیت نال اپنیاں خدمتاں انجام دے چکے نیں۔
ایس ویلے قومانتری کرکٹ وچ آسٹریلیا دے ڈیوڈ بون، انگلینڈ دے کرس براڈ، نیوزی لینڈ دے جیف کروو، سری لنکا دے رجن مدوگالے، جنوبی افریقا دے اینڈی پائی کرافٹ، بھارت دے جواگل سری ناتھ تے ویسٹ انڈیز دے رچی رچرڈسن میچ ریفری دے فرض نبھا رہے نیں۔
