لاہور(پاکستان پوائنٹ نیوز06۔مئی2017ء) 2010وچ قومی ٹیم دی قیادت دیاں ذمے واریاں سنبھالن والے 42ورھیاں دے مصباح الحق نوں پاکستان ٹیسٹ کرکٹ دی تواریخ دا کامیاب ترین کپتان منیا جاندا اے، پچھلے 7ورھیاں توں ٹیم دی قیادت کرن والے مصباح الحق قیادت دے منصب اُتے لَما چِر لنگھان دے نال نال ٹیم نوں جتوان دے اعتبار نال لیجنڈری آل راﺅنڈر عمران خان نوں وی پچھانہ چھڈ گئے نیں پر بارباڈوس ٹیسٹ ہارن مگروں مصباح الحق نے اک شرمناک ریکارڈ وی اپنے ناں کر لیا۔
ویسٹ انڈیز خلاف دوجا
ٹیسٹ میچ ہارن مگروں ایہ مصباح الحق دی بطور کپتان 19ویں ہار اے، جہدے مگروں اوہ نہ صرف ٹیسٹ کرکٹ وچ سبھ توں بُہتیاں ناکامیاں نال دو چار ہون والے کپتاناں وچ مڈھلے 10دی لسٹ وچ شامل ہو گئے نہیں بلکہ بُہتے ٹیسٹ میچ ہارن والے ایشیائی کپتاناں دی لسٹ وچ وی سری لنکا دے ارجنا رانا ٹنگا تے بھارت دے نواب منصور علی خان پٹودی دی صف وچ جا کھلوتے نیں۔ نواب پٹودی نے بطور کپتان 40ٹیسٹ میچاں وچوں 9جِتے تے 19ہار، سری لنکا دے ارجنا رانا ٹنگا نے 60ٹیسٹ میچاں وچوں 27جِتے تے 19ہارے جدکہ مصباح الحق نے بطور کپتان 55ٹیسٹ کھیڈے جہناں وچوں 25جتے تے 19ہارے۔
