سابق کپتان وکوچ وقار یونس فیملی نال چھٹیاں منان پاناما پہنچ گئے

لاہور(پاکستان پوائنٹ نیوز14۔اپریل2017ء) قومی کرکٹ ٹیم دے سابق کپتان و کوچ وقار یونس اج کل اپنی فیملی نال چھٹیاں منان پاناما وچ موجود نیں تے اوہناں نے اپنے سفر دیاں تصویراں سماجی رابطے دی ویب سائٹ ٹویٹر اُتے شیئر کیتیاں نیں۔ وقار یونس نے اپنی پہلی تصویر نال لکھیا اے کہ کوئی دس سکدااے کہ میں ایس ویلے دنیا دے کہڑے حصے وچ آں؟ جہدا جواب ٹھیک ہووے گا اوہناں وچوں پہلے 5نوں میں ٹویٹر اُتے فالو کراں گا۔ اوہناں نے ایس ٹویٹ وچ ہنٹ دتا کہ ایہ تھاں پاکستان وچ بہت ای مشہور اے۔ وقار یونس دے ذکر کیتے گئے ٹویٹ مگروں سماجی رابطے دی ویب سائٹ اُتے لوکاں دی وڈی گنتی نے آکے اندازے لانے شروع کر دتے نیں کہ وقار یونس ایس ویلے کتھے نیں۔ حیرت دی گل اے کہ اوہناں دے چاہیواناں وچوں کئیاں نے ٹھیک جواب دیند ے ہوئے پاناما دا ناں لیا۔ جہدے مگروں وقار یونس نے وعدے مطابق ٹویٹر اُتے اک تصویر شیئر کیتی تے اوہدے وچ لکھیا کہ ’پاناما پاکستان وچ بہت مشہور اے‘ اوہناں نے آکھیا کہ وعدے مطابق صحیح جواب دین والے پہلے 5ورتیندڑاں نوں فالو کراں گا۔