ڈونگہ بونگہ(پاکستان پوائنٹ نیوز11۔اپریل2017ء) مشہور کرکٹر شاہد آفریدی نے آکھیا اے کہ نوجواناں دے دِلاں چوں ملک تے پاک فوج دی محبت ختم نہیں کیتی جا سکدی، دین مدرسہ تے تبلیغ دی وجہ توں زندا اے ، ساڈے ساریاں دی ذمے واری اللہ تعالی دے پیغام نوں اگانہ لے کے ٹُرنا اے، عالم اسلام اج جہڑے مسئلیاں وچ پھسیا اے ایہ دین توں دوری دا نتیجہ اے، میرا سیاست نال کوئی تعلق نہیں اے، اپنی فاﺅنڈیشن دا کم میرے لئی ضروری اے۔
ایہناں خیالاں دا اظہار اوہناں نے جامع العلوم عید گاہ بہاولنگر دی 73ویں تقریب تکمیل بخاری شریف نال خطاب تے بہاولنگر کینٹ وچ بریگیڈ کمانڈر راحیل سلیم نال ملاقات تے میڈیا نال گل بات کردے ہوئے کیتا۔ ایس موقعے اُتے روحانی شخصیت الحدیث مولانا جیل احمد اخون وی اوہناں دے نال سن۔ شاہدی آفریدی نے آکھیا کہ جہڑے بندے دی زندگی وچ دین نہیں اوہ جنور توں بھیڑا اے۔
عالم اسلام اج جہڑے مسئلیاں وچ پھسیا ہویا اے ایہ دین توں دوری دا نتیجہ اے۔ مدرسے دین اسلام دی بہتر خدمت کر رہے نیں، مولانا جلیل احمد دی شخصیت توں ڈاڈھا متاثر آں تے ایس لئی بہاولنگر آیا واں۔ اوہناں نے نوجواناں نوں مخاطب کردے ہوئے آکھیا کہ اوہ اپنیاں زندگیاں وچ تبدیلی لیان۔ اوہناں نے آکھیا کہ پی ایس ایل کامیاب ہونا چاہیدا ٹیم کوئی وی ہووے۔ اوہناں دا کہنا سی کہ پی ایس ایل لئی اپنی ٹیم مُل نہیں لے رہیا۔
