نویں دِلی(پاکستان پوائنٹ نیوز20۔مارچ2017ء) قومی ٹیم دے سابق کپتان جاوید میانداد ولوں سپاٹ فکسنگ وچ ملوث کھڈاریاں نوں پھانسی دتے جان دا مطالبا کیتے جان مگروں گگلی ماسٹر عبدالقادر نے دعوا کیتا اے کہ جے وسیم اکرم تے انضمام الحق نوں پھانسی دِتی جاندی تے پاکستان کرکٹ نوں اک وار فیر ایہ دن نہ ویکھنے پیندے۔ بھارتی میڈیا دے مطابق 61ورھیاں دے عبدالقادر دا کہنا سی کہ ایس مندے کم وچ پہلے ملوث رہن والے کھڈاریاں دی پوری فہرست موجودا اے، جے وسیم اکرم، انضمام الحق تے مشتاق احمد نوں جرمانے کرن دی بجائے پھانسی دِتی جاندی تے پاکستان کرکٹ نوں اک وار فیر ایہ دن نہ ویکھنا پیندا، عطاءالرحمان تے سلیم ملک نوں اوس ویلے قربانی دا بکرا بنایا گیا سی۔
عبدالقادر دا ہور کہنا سی کہ وسیم اکرم، وقار یونس، انضمام الحق تے مشتاق احمد مختلف دور وچ قومی ٹیم نال جُڑے سن۔ کرکٹ بورڈ نے جسٹس قیوم کمیشن دی رپورٹ اُتے عملدرامد نہیں کیتا۔ یاد رہوے کہ پاکستان سپر لیگ دے دوجے ایڈیشن دے شروع توں ای اسلام آباد یونائیٹڈ دے شرجیل خان تے خالد لطیف نوں سپاٹ فکسنگ دے الزام پاروں معطل کر کے ملک واپس گھل دِتا گیا پر مگروں پی سی بی نے کُجھ ایس طرحاں دا الزام شاہ زیب حسن تے محمد عرفان اُتے وی لا کے معطل کر دِتا۔
