واشنگٹن(پاکستان پوائنٹ نیوز15۔مارچ2017ء) مشہور قومانتری رسالے ’بلو مبرگ‘ نے پاکستان وچ پی ایس ایل دا فائنل ہون نوں وڈی کامیابی قرار دیندے ہوئے آکھیا اے کہ ہن اشتہاری کمپنیاں پاکستانی کرکٹ وچ وڈی سرمایا کاری کرن دیاں خاہشمند نیں۔ بلومبرگ نے اپنی رپورٹ وچ آکھیا اے کہ پاکستان نوں ملک وچ قومانتری کرکٹ دی بندش پاروں لکھاں ڈالرز دا نقصان ہویا، لاہور وچ پی ایس ایل دے کامیاب فائنل مگروں ہن کئی وڈے بنک تے ادارے کرکٹ وچ اشتہاری سرمایا کاری کرنا چاہندے نیں۔
رسالے دے مطابق 30کروڑ ڈالرز مارکیٹ ویلیو دا پی ایس ایل پاکستان وچ منعقد کیتا جائے تے اوہدی کمائی کئی گنا ودھ ہو سکدی اے۔ رسالے نے پی سی بی چیئرمین شہریار خان دے حوالے نال آکھیا اے کہ کراچی وچ نیشنل کرکٹ سٹیڈیم دے نال فائیو سٹار رہائش گاہ بنان لئی اک وڈے ہوٹل نال گل بات جاری اے، آئی سی سی بورڈ اپنے سکیورٹی حکام تے پاکستان ٹاسک ٹیم نال مشورا کر کے آن والے مہینے پاکستان وچ قومانتری کرکٹ دے حوالے نال لائحہ عمل دیوے گا۔
رسالے نے پی ٹی آئی سربراہ عمران خان دا حوالا وی دتا اے جہناں دا کہنا اے کہ بھاویں پاکستان وچ امن و امان دی صورتحال وچ بہتری آئی اے پر قومانتری کرکٹ دی بحالی لئی اجے ہور استحکام دی لوڑ اے۔ رسالہ لکھدا اے کہ 20کروڑ بندیاں دے ملک وچ کرکٹ ہون دے وڈے معاشی فائدے موجود نیں تے پی ایس ایل فائنل دے کامیاب انعقاد پاروں سرمایا کاراں نوں دسیا گیا اے کہ اوہ کھیڈ دے شعبے وچ محفوظ سرمایا کاری کر سکدے نیں۔
