لاہور(پاکستان پوائنٹ نیوز09۔مارچ2017ء) قومی ٹیم دے سابق اوپنر سعید انور نے انکشاف کیتا اے کہ محمد یوسف نے خانہ کعبہ نوں ویکھن مگروں اپنے مسلمان ہون دی خبر نوں ساہمنے لیان دا فیصلا کیتا۔ تفصیل دے مطابق اک تقریب وچ گل بات کردے ہوئے سعید انور دا کہنا سی کہ یوسف نے 3سال اپنے اسلام لیان دی خبر لُکا کے رکھی، اک دن اوہنوں پتا لگا کہ ٹیم دے کُجھ کھڈاری خانہ کعبہ ویکھن جا رہے نیں جہدے اُتے اوہنے راشد لطیف نوں آکھیا کہ میں وی کعبہ ویکھنا اے، راشد لطیف نے یوسف نوں آکھیا کہ تہاڈے پاسپورٹ اُتے تے غیر مسلم لکھیا اے جہدے اُتے یوسف نے آکھیا کہ تُسیں کُجھ کرو، ٹیم نے مولانا طارق جمیل نال گل بات کیتی جہناں نے سعودیہ وچ اپنے بندیاں راہیں یوسف تے اوہدی گھر والی دے کاغذات بنوائے۔
اوہناں دا کہنا سی کہ یوسف جدوں انضمام الحق نال کعبہ ویکھن گیا تے انضمام نے اوہنوں آکھیا کہ میرے لئی وی دعا کرنا، جدوں یوسف تے اوہدی گھر والی نے خانہ کعبہ ویکھیا تے اوہ رُو پئے۔ سعید انور دا کہنا سی کہ یوسف نے واپسی اُتے اعلان کیتا کہ بھاویں اوہناں دی کرکٹ جائے یاں جان اوہ مسلمان ہون دا اعلان کرن گے۔ سعید انور دے مطابق مسلمان ہون مگروں محمد یوسف نے 5سال وچ کرکٹ دی دنیا اندر کرکٹ دے وڈے کھڈاری ڈان بریڈ مین دے ریکارڈ توڑن دے نال نال میری پسند دے کھڈاری ویوین رچرڈز دا 30سال پرانا ریکارڈ وی توڑیا۔
