دبئی(پاکستان پوائنٹ نیوز27۔فروری2017ء) پاکستان سپر لیگ (پی ایس ایل) دی ٹیم کوئٹہ گلیڈی ایٹرز اہم ترین میچ توں پہلے اوکڑاں نال دوچار اے کیونکہ فاسٹ باﺅلر محمد عمر گل دے زخمی ہون مگروں ہن سری لنکن کھڈاری تھیسارا پریرار نے وی ٹیم دا ساتھ چھڈ دِتا اے تے اوہ اپنی قومی ٹیم دی نمائندگی لئی ملک واپس چلے گئے نیں۔ تفصیل دے مطابق تھیسارا پریرار نے ملک واپسی توں پہلے اپنے پیغام وچ آکھیا کہ مینوں پاکستان سپر لیگ نال جُڑ کے بہت مزہ آیا تے اوہناں نے اپنی فرنچائز لئی نیک خاہشاں دا اظہار کردے ہوئے امید ظاہر کیتی کہ گلیڈی ایٹرز چیمپیئن شپ دا تاج سراُتے سجان گے۔
یاد رہوے کہ ایس توں پہلے پشاور زلمی خلاف میچ وچ وہاب ریاض دی گیند وَجن نال عمر گل دی بانہ دی ہڈی فریکچر ہو گئی جہدے پاروں اوہ پی ایس ایل توں باہر ہو گئے نیں۔ کوئٹہ گلیڈی ایٹرز پلے آف مرحلے لئی پہلے ای کوالیفائی کر چکی اے جتھے اوہدا مقابلا ڈیرین سیمی دی ٹیم پشاور زلمی نال ہووے گا۔
