دبئی(پاکستان پوائنٹ نیوز27۔فروری2017ِء) پاکستان سپر لیگ دے وچ پشاور زلمی دی نمائندگی کرن والے بنگلا دیشی آل راﺅنڈر شکیب الحسن پاکستان وچ کھیڈن لئی اُتاولے نظر آ رہے نیں پر اوہ زلمی دے فائنل وچ پہنچن اُتے اپنی انٹرنیشنل مصروفیات دی وجہ توں پاکستان نہیں آن گے۔ اپنے اک انٹرویو وچ شکیب الحسن دا کہنا سی کہ میں آخری وار 2008وچ پاکستان جا کے کھیڈن دا موقع ملیا جو میرے لئی اک چنگا تجربا رہیا۔
اوہناں دا کہنا سی کہ اوتھوں دا ماحول گراﺅنڈ تے لوک سبھ شیواں شاندار سن۔ اوہناں دا کہنا سی کہ میں حالات بہتر ہون اُتے پاکستان جا کے کھیڈنا چاہنا واں۔ آل راﺅنڈر نے آکھیا کہ پی ایس ایل دے پاکستان توں باہر انعقاد کُجھ رونقاں ضرور مَٹھیاں پئیاں نیں، جے ایونٹ پاکستان وچ ہوندا تے زیادا رونق ہونی سی۔ شکیب نے پچھلے ایڈیشن وچ کراچی کنگز دی نمائندگی کیتی سی تے چالو ایڈیشن وچ اوہ پشاور زلمی دی نمائندگی کر رہے نیں۔
ون ڈے انٹرنیشنلز تے ٹی 20دے نمبر ون آل راﺅنڈر ایس توں پہلے 2009وچ پاکستان آ کے کھیڈے سن، ون ڈے سیریز وچ بھاویں بنگلا دیش نوں پاکستان ہتھوں 5.0نال وائٹ واش دا ساہمنا کرنا پیا سی پر شکیب الحسن نے بیٹنگ تے بولنگ وچ چنگی کارکردگی دا وکھالا کیتا سی۔ اوہناں نوں ایس دوران اک میچ وچ مین آف دی میچ ایوارڈ وی ملیا سی۔ یاد رہوے کہ شکیب الحسن تے دوجے بنگلا دیشی کھڈاری انٹرنیشنل مصروفیات پاروں 28فروری نوں واپس چلے جان گے۔
