لاہور(پاکستان پوائنٹ نیوز16۔فروری2017ء) پاکستان کرکٹ بورڈ دے چیئرمین شہریار خان دا کہنا اے کہ پی ایس ایل وچ سپاٹ فکسنگ دے الزام وچ معطل شرجیل خان تے خالد لطیف دے بیاناںدی ہن ویڈیو ریکارڈنگ کیتی جا رہی اے تاں جے بعدوں کوئی قانونی پیچیدگی نہ ہووے۔ تفصیل دے مطابق قذافی سٹیڈیم دے باہر میڈیا نال گل بات کردے ہوئے شہریار خان نے آکھیا کہ سپاٹ فکسنگ وچ ملوث کھڈاریاں نال ہن تک غیر رسمی گل ہوئی سی پر ہن اوہناں دی گل بات نوں ریکارڈ کیتا جا رہیا اے تاں جے اوہناں دے عدالت جان دی صورت وچ پی سی بی کول پَکے ثبوت ہون۔
شہریار خان دا ہور کہنا سی کہ پلیئرز نے اپنی فیملی نال مشورے لئی ٹائم منگیا سی جو اوہناں نوں دے دِتا گیا سی۔اک سوال دے جواب وچ اوہناں دا کہنا سی کہ پی سی بی پاکستان سپر لیگ دا فائنل لاہور وچ کروان لئی اپنیاں تیاریاں کر رہی اے۔
