لاہور(پاکستان پوائنٹ نیوز15۔فروری2017ء) برطانیا وچ گرفتار تے بعد وچ ضمانت اُتے رہا ہون والے پاکستانی معطل کرکٹر ناصر جمشید بارے پتا لگا اے کہ اوہ عادی مجرم نیں، 5اپریل 2010نوں کرکٹ دی ویب سائٹ نے اک رپورٹ چھاپی سی جہدے مطابق ناصر جمشید 10ویں جماعت دے انگریزی دے پرچے وچ نقل کردے ہوئے لاہور وچ گرفتار ہوئے سن تے 20ہزار رُپئے ضمانت اُتے رہا ہوئے۔
ایہ اوس ویلے دی گل اے جدوں پی سی بی نے اوہناں نوں 37رکنی سکواڈ لئی چُنیا نہیں سی تے اوہدے مگروں اک مہینے بعد امتحان وچ اپنے بیلی حبیب اللہ، غلام مصطفی تے ضیاءالحق دی مدد نال نقل کردے ہوئے پھڑے گئے۔ نگران امتحان نوں پولیس دے حوالے کرن ویلے تک ایہ نہیں پتا سی کہ ناصر جمشید اک قومانتری سطح دا کرکٹر اے۔ ٹائمز آف انڈیا دے مطابق ناصر جمشید دا کہنا سی کہ اوہ اپنے دوستاں دی مدد کرن امتحانی سینٹر گئے سن جو اوہناں دی غلطی سی ، اوہناں نے نگران امتحان نوں دسیا پر اوہ نہ منے ۔
ناصر جمشید بنگلا دیش پریمئر لیگ دے دوران وی اینٹی کرپشن اہلکاراں دی تفتیش بھگت چکے نیں۔ بی پی ایل وچ سپاٹ فکسنگ دے الزام وچ گرفتار کراچی دے بکی ساجد خان دے موبائل توں ناصر جمشید دا بنک اکاﺅنٹ نمبر برآمد ہویا سی۔ ساجد نے تفتیش دوران مَنیا سی کہ اوہنے ناصر جمشید نال ڈیل کیتی سی۔ ناصر جمشید نے چٹاگانگ کنگز ولوں کھیڈدے ہوئے ابتدائی میچاں وچ 290سکور بنائے جدکہ آخری دو میچاں وچ صرف 38سکور کیتے۔ آئی سی سی دے اینٹی کرپشن تے سکیورٹی یونٹ نے وی ناصر جمشید توں تفتیش کیتی سی۔
