ممبئی (پاکستان پوائنٹ نیوز21۔مئی2018ء ) اک سروے مطابق دنیا بھر وچ سبھ توں زیادہ بھارت وچ سوانیاں نوں جنسی تشدد تے زیادتی دا نشانہ بنایا جاندا اے۔ بھارت دے کئی شہراں وچ آئے دن جنسی زیادتی تے تشدد دے واقعات ساہمنے آؤندے نیں۔ پر ہن بالی ووڈ دی مشہور اداکارہ سشمیتا سین نے پریس کانفرنس کردے ہوئے آکھیا کہ کئی وار سانوں آکھیا جاندا اے کہ تہاڈے نال تے اینے لوک تے اینے باڈی گارڈ ہوندے نیں، تہانوں کیہ پتا ہوئے کہ جنسی طور اُتے ہراساں کرنا کیہ ہوندا اے۔
اوہناں نے آکھیا کہ اک سوانی ہون دے ناطے میں جاننی آں کہ جنسی طور اُتے ہراساں ہونا کیہ ہوندا اے کیونکہ اینے سارے باڈی گارڈاں دے ہوندے ہوئے وی اسیں جنسی ہراسگی دا نشانہ بن جانے آں۔ اوہناں نے آکھیا کہ کُجھ چِر پہلاں ای اک ایوارڈ فنگشن وچ موجود ساں، جتھے میرے دوالے بہت مرد سن ۔ اک دم مینوں اپنے لک اُتے کسے دا ہتھ محسوس ہویا۔ مینوں دفاع کرنا آؤندا اے ایس لئی میں اپنے دفاع وچ اوسے ہتھ نوں پھڑ لیا تے جدوں بندے نوں ساہمنے لیا کے ویکھیا تے میں حیران ہو گئی کہ اوہ اک 15سال دا مُنڈا سی۔
سشمیتا سین نے دسیا کہ میں اوس مُنڈے نوں دھون توں پھڑیا تے غیر محسوس انداز وچ اپنے نال دور لے گئی۔ پہلے اوہنے انکار کیتا پر جدوں میں اوہنوں آکھیا کہ میری اک آواز اُتے تیرا کیریئر ختم ہو سکدا اے، توں جیل جا سکنا تے اوہ ڈر گیا تے میرے توں معافی منگ لی۔ اوس دن توں بعد مینوں اندازہ ہویا کہ ایس 15سال دے بال نوں کسے نے ایہ نہیں دسیا کہ ایہ کوئی تفریح نہیں اے بلکہ اک غلطی اے جو کدی نہیں ہونی چاہیدی۔اوہناں دا کہنا سی کہ سوانیاں دا جنسی استحصال کرن والیاں نوں لٹکا دینا چاہیدا تاں جے کسے دی اینی ہمت نہ ہوئے۔
