نویں دِلی(پاکستان پوائنٹ نیوز17۔اکتوبر۔2018ء) بھارت وچ جنسی ہراسگی خلاف شروع ہون والے ’می ٹو‘ مہم وچ کئی انکشافات ساہمنے آئے نیں۔ ایس مہم دے تحت سوشل میڈیا اُتے کئی ورتیندڑاں،اداکاراں،گلوکاراں تے سوانیاں نے بہت سارے مشہور بندیاں اُتے جنسی ہراسگی دے الزام لائے ،جیہناں نے سوشل میڈیا ورتیندڑاں(صارفین) نوں حیران کر دتا۔ ’می ٹو‘ مہم دے تحت سوشل میڈیا اُتے الزام لان تے انکشافات دا کم جاری اے۔
تے ہن مشہور ماڈل پوجا مشترا ’می ٹو‘ مہم دا حصہ بن گئیاں نیں ۔جیہناں نے سلمان خان تے اوہناں دے بھراواں اُتے جنسی طور اُتے ہراساں کرن دا الزام لایا اے۔ بھارتی میڈیا رپورٹس مطابق پوجا مشترا نے آکھیا کہ فلم ’سلطان‘ دی شوٹنگ دوران سلمان خان تے اوہناں دے بھرا ارباز خان تے سہیل خان نے اوہناں نال زیادتی کیتی۔ اوہناں نے آکھیا کہ سلمان خان تے اوہناں دے بھراواں نے مینوں کئی موقعیاں اُتے جنسی طور اُتے ہراساں کیتا تے نیم بے ہوشی دی حالت وچ میرا ریپ کیتا۔
پوجا مشرا نے اداکار شتروگن سنہا اُتے وی ہراساں کرن دا الزام لایا تے آکھیا کہ اوہناں نے میرے اُتے کالا جادو وی کیتا۔ تے نہ صرف ایہ بلکہ شتروگن سنہا نے میرا موبائل تے لیپ ٹاپ وی ہیک کیتا تاں جے اوہ میرے تخلیقی آئیڈیا زنوں چوری کر لین تے اوہناں تخلیقی آئیڈیاز دی وجہ توں اوہناں نے اپنی دھی سناکشی سنہا دا کیریئر بنایا۔ پوجا مشترا نے سلمان خان دی سابقہ بھرجائی ملائکہ اروڑا نوں حاسد قرار دیندے ہوئے آکھیا کہ اوہ میری شہرت توں سڑدیاں سن۔ ملائکہ نے انڈسٹری وچ اگانہ ودھن توں روکدے ہوئے مینوں ہراساں کیتا۔
