ممبئی(پاکستان پوائنٹ نیوز04۔مئی2018ء ) اداکارہ کرشمہ کپور نے بالی ووڈ دے سلطان سلمان خان نال اپنے تعلق بارے اہم انکشاف کیتا اے۔ بالی ووڈ دے دبنگ اداکار سلمان خان تے کرشمہ کپور نوں 90دے دہاکے دی بہترین جوڑی منیا جاندا سی تے دوواں نے انڈسٹری نوں ’انداز اپنا اپنا‘ ’بیوی نمبر ون‘ ’جیت‘ تے ’جڑواں‘ ورگیاں ہٹ فلماں دتیاں جدکہ سلو میاں کرشمہ دی نِکی بھین کرینہ کپور نال وی بلاگ بسٹر فلم ’بجرنگی بھائی جان‘ تے ’باڈی گارڈ‘ وچ کم کر چکے نیں پر کرشمہ دا کہنا اے کہ اوہ کرینہ دی بجائے سلمان دے نیڑے نیں۔
بھارتی میڈیا رپورٹس مطابق اک ٹی وی شو وچ گل بات کردے ہوئے کرشمہ کپور دا کہنا سی کہ میں سلمان خان نال بہت چنگا ویلا لنگھایا اے تے ساڈے وچکار چنگے تعلقات رہے نیں اوہ میرے بُہتا نیڑے نیں جدکہ کرینہ کپور نوں اوہ اج وی بالڑی ای سمجھدے تے اپنی نِکی بھین مندے نیں۔ آؤندے ویلے نوں فلماں وچ کم کرن بارے کرشمہ دا کہنا سی کہ بیتے ویلے وچ اوہناں نے ’بیوی نمبر ون‘ وچ کم کیتا سی پر ہن جے کوئی ’ممی نمبر ون‘ بنانا چاہوے تے اوہ ایہدے وچ کم کرنا چاہن گیاں کیونکہ اوہ اپنے بالاں نال بہت پیار کردیاں نیں تے لوکاں نوں ماں دے پیار بارے دسنا چاہندیاں نیں۔
