لاہور(پاکستان پوائنٹ نیوز06۔فروری2018ء) قصور وچ معصوم بالڑی زینب دے قتل مگروں ملک بھر وچ بالاں نوں جنسی تعلیم دین لئی آواز چُکی جا رہی اے ۔ لوکاں دا ایس حوالے نال کہنا اے کہ بالاں نوں جنس بارے دسنا ضروری ہو گیا اے۔ شوبز انڈسٹری توں تعلق رکھن والے بندیاں توں وکھ ہور لوک وی ایس گل اُتے راضی وکھالی دتے پر رابی پیرزادہ ایہدے خلاف نیں۔ رابی نوں سوشل میڈیا اُتے اپنے موقف دا وکھالا کرنا مہنگا پے گیا ۔
رابی پیرزادہ نے سوشل میڈیا ویب سائٹ ٹویٹر اُتے جاری پیغام وچ آکھیا کہ جتھوں تیکر بالاں نوں جنسی تعلیم دین دا سوال اے، میرا خیال اے کہ بالاں نوں جنسی تعلیم نہیں دینی چاہیدی۔ اوہناں دا کہنا اے کہ سانوں اپنی سکیورٹی ویکھنی چاہیدی کیونکہ ایہ وڈیاں دا قصور اے۔ سانوں بالاں دے دماغ تے بچپن نوں خراب نہیں کرنا چاہیدا۔ اوہناں دا پیغام ساہمنے آؤندے ای سوشل میڈیا ورتیندڑاں ولوں اوہناں نوں تنقید دا نشانہ بنایا جا رہیا اے۔ رابی پیرزادہ نوں لوک کھریاں کھریاں سنا رہے نیں پر کُجھ لوک اوہناں دی حمایتی وی نظر آئے۔
