اسلام آباد(پاکستان پوائنٹ نیوز07۔فروری2017ء) وفاقی وزیر ریاض پیرزادہ پاکستان دے قومی کھیڈ توں ای جانو نہیں، رکن قومی اسمبلی دے سوال دے جواب وچ کبڈی نوں وی قومی کھیڈ قرار دے دِتا، پی پی پی دے رکن اسمبلی دا کبڈی دے علاقائی کھیڈ نوں قومی کھیڈ قرار دین اُتے احتجاج، سپیکر سردار ایاز صادق نے ایہ آکھ کہ وفاقی وزیر نوں بچایا کہ وزیر صاحب نے ہاکی نوں وی قومی کھیڈ قرار دِتا اے۔
تفصیل دے مطابق پچھلے دیہاڑے سوالاں دے وقفے دوران وفاقی وزیر برائے بین الصوبائی رابطا و کھیڈ ریاض پیرزادہ نے پی ٹی آئی دے رکن ساجد احمد دے سوال دے جواب وچ کبڈی نوں وی قومی کھیڈ قرار دے دِتا۔ ساجد احمد نے پُچھیا سی کہ پاکستان دا قومی کھیڈ کہڑا اے، ریاض پیزادہ نے سوال دا سِدھا جواب دین دی بجائے ایدھر اُودھر دیاں گلاں شروع کر دِتیاں تے آکھیا کہ کبڈی ساڈا قومی کھیڈ اے جدکہ ہاکی وی ساڈا قومی کھیڈ اے۔
وزیر دے جواب اُتے پیپلز پارٹی دے رکن عبدالستار بچانی نے آکھیا کہ وزیر کھیڈ نوں ایہ نہیں پتا کہ کبڈی قومی کھیڈ نہیں اک علاقائی کھیڈ اے، ایس طرحاں سندھ وچ ’ملا کھڑا‘ تے بلوچستان وچ فٹبال بہت مشہور نیں۔ سپیکر ایاز صادق نے ایہ آکھ کے ریاض پیرزادہ نوں مشکل صورتحال وچوں کڈھیا کہ وفاقی وزیر نے ہاکی دا وی ناں لیا اے کہ ایہ ساڈا قومی کھیڈ اے۔ ایس سارے معاملے مگروں ریاض پیرزادہ نے عبدالستار دے سوال دے جواب وچ طنزیا انداز وچ آکھیا کہ معزز رکن تے صرف گلی ڈنڈا چنگا کھیڈ لیندے نیں۔
