اسلام آباد(پاکستان پوائنٹ نیوز28۔جنوری2017ء) پاناما لیکس کیس بارے آئینی درخاستاں دی سنوائی روز وار بنیاداں اُتے سپریم کورٹ وچ جاری اے۔ سپریم کورٹ دے باہر سنوائی وچ وقفے تے سنوائی ختم ہون مگروں (ن) لیگی رہنما میڈیا نال گل بات کردے نیں۔ (ن) لیگی دی میڈیا ٹاک وچ عدالتاں بارے بیان اُتے ردعمل دیندے ہوئے وزیر اعظم نواز شریف دے وکیل مخدوم علی خان نے اوہناں دا مقدما چھڈن دے دھمکی دے دِتی اے۔
قومی اخبار ’ایکسپریس‘ وچ چھپن والی خبر اندر دسیا گیا کہ مخدوم علی خان نے دھمکی دِتی اے کہ عوامی سطح اُتے مقدما لڑنا اے تے اوہ ایس مقدمے توں وکھ ہو جاندے نیں۔ اوہناں نے آکھیا کہ ایس طرحاں دے حالات وچ سابق صدر پرویز مشرف دی پیروی وی چھڈ دِتی سی۔ اوہناں دا کہنا سی کہ جے (ن) لیگی رہنماواں نے اپنے غیر ضروری تبصرے یاں بیان نہ روکے تے اوہ پاناما کیس وچ وزیر اعظم نواز شریف دے کیس دی پیروی چھڈ دین گے۔
اخبار و چ چھپن والی خبر اندر دسیا گیا کہ (ن) لیگی رہنماواں نے فاضل ججاں بارے کُجھ بیان دِتے سن جہدے اُتے مخدوم علی خان پریشانی دا شکار نیں۔ وسیلیاں نے دعوا کیتا اے کہ وزیر اعظم نوں اوہناں دے سیاسی ساتھیاں نے ایس گل اُتے قائل کیتا اے کہ عدالت تے اسٹیبلشمنٹ اُتے کُجھ دباءپانا ضروری اے۔
