نفرت بھرے بیان: پیمرا نے ڈاکٹر عامر لیاقت حسین اُتے پابندی لا دِتی

اسلام آباد(پاکستان پوائنٹ نیوز26۔جنوری2017ء) پاکستان الیکٹرانک میڈیا ریگولیٹری اتھارٹی (پیمرا) نے ڈاکٹر عامر لیاقت حسین اُتے پابندی لا دِتی اے۔ تفصیل دے مطابق ڈاکٹر عامر لیاقت حسین اُتے پابندی نفرت بھرے بیان دین تے اپنے پروگرام وچ نفرت کِھلارن کارن لائی گئی اے۔ ڈاکٹر عامر لیاقت حسین نجی ٹی وی چینل ’بول‘ اُتے پروگرام دی مجمانی کردے سن۔ پیمرا ولوں جاری نوٹی فکیشن وچ دسیا گیا کہ نفرت کِھلارن اُتے ڈاکٹر عامر لیاقت حسین تے اوہناں دے پروگرام اُتے پابندی لا دِتی گئی اے۔ ایس پابندی دے تحت ڈاکٹر عامر لیاقت ’بول‘ ٹی وی اُتے تجزیانگار، مجمان یاں اداکار دے طور اُتے نہیں آ سکدے۔ ایس توں وکھ ڈاکٹر عامر لیاقت حسین اُتے آڈیو تے ویڈیو پیغام دین تے کسے وی اشتہار وچ آن اُتے وی پابندی لا دِتی گئی اے۔ نوٹی فکیشن وچ ہور دسیا گیا کہ پابندی دی خلاف ورزی کرن اُتے ’بول‘ دا لائسنس فوری طور اُتے کینسل کر دِتا جائے گا۔ ڈاکٹر عامر لیاقت اُتے کسے وی ٹی وی چینل دے پروگرام وچ کسے نوں غدار یاں کافر آکھن دے نال نال نفرت بھرے بیان دین اُتے پابندی ہووے گی۔ خلاف ورزی دی صورت وچ پیمرا آرڈیننس 2002دے تحت ایس طرحاں دے چینلز خلاف کارروائی کیتی جائے گی۔