اسلام آباد(پاکستان پوائنٹ نیوز25۔جنوری2017ء) سپریم کورٹ وچ پاناما لیکس بارے درخاستاں دی سنوائی دا سلسلا جاری اے۔ سپریم دے باہر میڈیا نال گل بات کردے ہوئے پی ٹی آئی چیئرمین عمران خان نے آکھیا کہ اج عدالت وچ مریم نواز دے وکیل شاہد حامد نے مَنیا کہ مریم، نواز شریف نال رہندی اے۔ اوہناں نے آکھیا کہ مینوں کدی وی چنگا نہیں لگدا کہ میں کسے خاندان اُتے گل کراں۔
اوہناں دا کہنا سی کہ جے مریم نواز دی پراپرٹی دا فیصلا ہویا تے کیس ختم ہو جاندا اے۔ اسیں صرف عدالت دی مدد کر رہے آں جدکہ اصل ثبوت تے اوہناں کول نیں۔ اوہناں نے آکھیا کہ مریم نواز بینفیشری مالک نیں یاں ٹرسٹی نیں، ثبوت دینا اوہناں دا کم اے۔ عدالت وچ ایہ گل واضح ہو گئی اے کہ ثبوت اوہناں نے ای دینے نیں۔ عمران خان نے آکھیا کہ جِنے ثبوت نیں سارے ایہو آکھدے نیں کہ مریم نواز اصل مالک اے۔
اوہناں نے آکھیا کہ ایف آئی اے دی رپورٹ اے کہ لندن فلیٹس مریم نواز دے نیں، عدالت نے آکھیا کہ جو کُجھ ہو رہیا اے ساڈے ولوں دِتیاں گئیاں دستاویزات اُتے ہو رہیا اے۔عمران خان دا کہنا سی کہ آئی سی آئی جے دے مطابق وی مریم نواز لندن فلیٹس دی مالک اے، ایف بی آر نواز شریف لئی نویں نویں کاغذات بنا رہی اے۔ اوہناں نے آکھیا جے ایہ ساریاں دستاویزات جعلی نیں تے نواز شریف خاندان تے اوہدے سارے بندے برطانوی اخبار اُتے کیس کرن۔ اوہناں دا کہنا سی کہ برطانوی اخباروچ چھپن والیاں دستاویزات نوں جعلی آکھیا جا رہیا اے۔ اسیں وی آئی سی آئی جے دی ویب سائٹ اُتے موجود دستاویزات دے رہے آں پر حکومت ولوں کوئی دستاویز پیش نہیں کیتی گئی۔
