اسلام آباد(پاکستان پوائنٹ نیوز20۔جنوری2017ء) سپریم کورٹ وچ پاناما کیس دی سنوائی دے دوران جسٹس آصف سعید کھوسہ نے ریمارکس دِتے کہ استثنی نہیں آرٹیکل 66دے تحت استحقاق منگا گیا، آرٹیکل 248دے تحت استثنی، 66دے تحت استحقاق وکھ شیواں نیں، جسٹس اعجاز افضل خان نے آکھیا کہ استثنی تے استحقاق وچ فرق اے جدکہ جسٹس اعجاز الاحسن نے آکھیا کہ وزیر اعظم نواز شریف نے استثنی نہیں منگیا۔
تفصیل دے مطابق جمعے نوں سپریم کورٹ دے جسٹس آصف سعید کھوسہ دی سربراہی وچ جسٹس اعجاز افصل خان، جسٹس گلزار احمد، جسٹس شیخ عظمت سعید تے جسٹس اعجاز الاحسن اُتے مشتمل 5رکنی بنچ نے امیر جماعت اسلامی پاکستان سینیٹر سراج الحق، چیئرمین تحریک انصاف عمران خان، سربراہ عوامی مسلم لیگ شیخ رشید احمد تے طارق اسد ایڈووکیٹ ولوں وزیر اعظم نواز شریف تے اوہناں دے خاندان دے بندیاں دیاں آف شور کمپنیاں دیاں تحقیقات لئی دائر درخاستاں دی سنوائی کیتی۔
سنوائی شروع ہوئی تے جماعت اسلامی دے وکیل توفیق آصف نے دلائل دی شروعات کردے ہوئے آکھیا کہ وزیر اعظم صادق تے امین نیں رہے، وزیر اعظم نے لندن دے اثاثے لُکائے، وزیر اعظم دی اسمبلی تقریر ثبوت دے طور اُتے ورتی جا سکدی اے، عدالت نوں ڈیکلریشن دین دا اختیار اے، وزیر اعظم نے فلیٹس دی ملکیت توں انکار نہیں کیتا، وزیر اعظم نے بطور ایم این اے اپنے حلف دی خلاف ورزی کیتی، وزیر اعظم نے تقریر وچ فلیٹس دی مکیت نوں مَنیا، اتفاق فاﺅنڈری 1990وچ کسارے اندر سی، صرف تن سال وچ کسارا ختم کر کے 60کروڑ منافعے وچ چلی گئی، 1985وچ اتفاق فاﺅنڈری دا دائرا کئی کمپنیاں تک پہنچ گیا، دبئی وچ گلف سٹیل مل بنائی گئی پر ایہ نہیں دسیا گیا کہ پیسے کتھوں آئے؟ وزیر اعظم نے تقریرت وچ آکھیا کہ فلیٹس 1993توں 1996وچ خریدے گئے۔
جسٹس آصف سعید کھوسہ نے آکھیا کہ ایہ گل کتھوں مَنی گئی،جے ایہ ہوندا تے اسیں اینے دِناں توں ایہ کیس کیوں سُن رہے آں۔ جسٹس شیخ عظمت سعید نے آکھیا کہ تہاڈا کیس تحریک انصاف توں بہت وکھ اے۔ توفیق آصف نے آکھیا کہ وزیر اعظم نے آکھیا کہ ایہ وسائل جہناں توں لندن فلیٹس خریدے گئے۔ جسٹس آصف سعید کھوسہ نے آکھیا کہ خریدن دی حد تک اعتراف ضرور کیتا گیا اے۔
سوال ایہ اے کہ فلیٹس کدوں، کہنے تے کیویں خریدے، وزیر اعظم نے فلیٹس دی ملکیت نوں مَنیا نہیں، حسین نواز نے فلیٹس دی ملکیت نوں مَنیا اے۔ جسٹس اعجاز الاحسن نے آکھیا کہ وزیر اعظم ہے تھاں اپنے والد دا ذکر کیتا اے۔ جسٹس آصف سعید کھوسہ نے آکھیا کہ سوال ایہ وی اے کہ فلیٹس 2006توں پہلے خریدے گئے یاں نہیں، سوال ایہ وی اے کہ وزیر اعظم دا فلیٹس توں کوئی تعلق اے یاں نہیں۔
توفیق آصف ولوں ظفر علی شاہ کیس دا حوالا دِتا گیا۔ جسٹس شیخ عظمت سعید نے آکھیا کہ ویکھنا پئے گا نواز شریف کیس وچ فریق سن یاں نہیں۔ توفیق آصف نے آکھیا کہ کیس وچ خالد انور نواز شریف دے وکیل سن۔ جسٹس آصف سعید کھوسہ نے آکھیا کہ فائل منگوا لئی اے، پتا لگ جائے گا خالد انور کیس دے وکیل سن۔ جسٹس شیخ عظمت سعید نے آکھیاکہ فیصلے وچ کیتے نہیں لکھیا خالد انور نواز شریف دے وکیل سن، جہڑیاں گلاں دا تُسیں حوالا دے رہے او اوہ دلائل وچ عدالتی رائے نہیں۔
توفیق صاحب کُجھ خدا دا خوف کرو۔ جسٹس آصف سعید کھوسہ نے آکھیا کہ نعیم بخاری نے التوفیق کیس دا حوالا دتا سی، توفیق آصف نے آکھیا کہ وزیر اعظم دے لفظ ایہ کہ ’ایہ نیں اوہ وسیلے‘ میں ملکیت مَننا واں۔ اوہناں دا کہنا سی کہ مقدمے وچ ثبوت دینا شریف خاندان دا کم اے، ثبوت دے طور اُتے نواز شریف نے تن تقریراں کیتیاں، عدالت وچ نواز شریف نے استثنی منگیا اے۔
