ڈاکٹر عافیہ صدیقی دی رہائی لئی ڈاکٹر شکیل آفریدی نوں امریکا دے حوالے کرن دی پیشکش

ڈاکٹر عافیہ صدیقی دی رہائی لئی ڈاکٹر شکیل آفریدی نوں امریکا دے حوالے کرن دی پیشکش

اسلام آباد(پاکستان پوائنٹ نیوز18۔جنوری2017ء) پچھلے دِنا امریکا وچ ڈاکٹر عافیہ صدیقی دی وکیل کیتھی مینلے نے اک ویڈیو پیغام جاری کیتا سی جو سوشل میڈیا اُتے وائرل وی ہویا۔ اپنے ایس پیغام وچ ڈاکٹر عافیہ دی وکیل دا کہنا سی کہ اوباما اپنے صدارتی دور دے آخیر اُتے ڈاکٹر عافیہ صدیقی نوں رہا کر سکدے نیں پر افسوس دی گل ایہ اے کہ پاکستان ولوں ڈاکٹر عافیہ صدیقی دی رہائی لئی اجے تک کوئی کوشش نہیں کیتی گئی۔

پر ہن قومی اخبار ’جنگ‘ وچ چھپن والی اک رپورٹ وچ پاکستان دے مشہور پرچاکار انصار عباسی نے دسیا کہ پچھلے دو ہفتیاں دے دوران پاکستانی حکومت نے ڈاکٹر عافیہ صدیقی دی امریکا توں رہائی تے امریکا توں معافی لئی اوباما دے صدارتی دور دے ختم ہون کارن کوشش کیتی۔ پاکستان ولوں ڈاکٹر عافیہ دی تھاں ڈاکٹر شکیل آفریدی نوں امریکا گھلن دی پیشکش وی کیتی گئی اے جہنوں امریکا نے رَد کر دِتا اے۔

ڈاکٹر عافیہ صدیقی دی رہائی دی امید اجے وی باقی اے پر انصار عباسی دے مطابق کُجھ وسیلیاں نے دسیا اے کہ معافی یاں ڈاکٹر عافیہ دے بدلے ڈاکٹر شکیل آفریدی دی حوالگی دا کوئی امکان نہیں اے۔ اوہناں نے دسیا کہ اوباما انتظامیا ڈاکٹر عافیہ دی تھاں امریکا وچ اک ہور گرفتار ہوئے ڈاکٹر دی حوالگی دی خاہشمند سی پر اسلام آباد انتظامیا نے ایہ گل منن توں انکار کر دِتا۔

ایس معاملے اُتے وزیر اعظم میاں محمد نواز شریف تے جان کیری چالو مہینے کئی وار گل کر چکے نیں جدکہ وفاقی وزیر خزانا اسحاق ڈار نے وی ڈاکٹر عافیہ صدیقی نوں امریکا بدر کروان دی کوشش کیتی۔ وفاقی وزیر خزانا نے ڈاکٹر عافیہ صدیقی دا معاملا چُکن لئی نواز شریف نوں اوہناں دے 2015وچ کیتے گئے امریکا دے دورے دوران وی ہدایت کیتی سی۔ وزیر اعظم نے جان کیری توں ڈاکٹر عافیہ دی رہائی تے اوہناں دی معافی دا مطالبا کردے ہوئے آکھیا سی کہ انج کرن نال امریکا دا پاکستان وچ تاثر بہتر ہووے گا پر جان کیری نے ایہ آکھدے ہوئے انکار کر دِتا سی کہ ڈاکٹر عافیہ صدیقی دے جرم دی نوعیت پاروں انج کرنا ممکن نہیں اے۔

وزیر اعظم نواز شریف نے جان کیری نوں ڈاکٹر عافیہ صدیقی دی رہائی دے بدلے ڈاکٹر شکیل آفریدی نوں امریکا دے حوالے کرن دی پیشکش وی کیتی پر جان کیری نے آکھیا کہ امریکا ڈاکٹر عافیہ دی بجائے امریکا وچ قید اک ہور پاکستانی مرد نوں پاکستان دے حوالے کر سکدا اے جدکہ بعد وچ اسحاق ڈار نے امریکی ڈپٹی وزیر ٹونی بلنکن نال وی رابطاکیتا تے یقین دہانی کروائی کہ ڈاکٹر عافیہ صدیقی نوں لوکاں دی پہنچ توں دور رکھیا جائے گا۔

اسحاق ڈار نے ٹونی بلنکن ولوں معاملے نوں ناقابل عمل قرار دین دے بعد آکھیا کہ جے ڈاکٹر عافیہ نوں رہا نہ کیتا گیا تے پاکستان ایہ معاملا نویں امریکی حکومت ساہمنے رکھے گا۔ وسیلیاں نے دسیا کہ پاکستان دی قیدیاں دی تبدیلی دی پیشکش قانون دے عین مطابق سی۔ پاکستان نے امریکی حکام نوں دسیا سی کہ امریکا توں ڈاکٹر عافیہ دی رہائی تے امریکی صدارتی معافی ملن دے بعد پاکستانی صدر توں درخاست کیتی جائے گی کہ اوہ وی ڈاکٹر شکیل بارے انج ای کرن۔