اسلام آباد(پاکستان پوائنٹ نیوز11۔جنوری2017ء) پاکستان مسلم لیگ (ن) دی رہنما مریم نواز نے آکھیا اے کہ بالاں نوں چنگی تعلیم دینا حکومت دی ذمے واری اے، 2018تک نواں تعلیمی نظام دے کے جاواں گے، وفاقی دارالحکومت وچ سکولاں دی اپ گریڈیشن دے بعد سرکاری تے پرائیویٹ سکولاں وچ کوئی فرق نہیں رہوے گا، معیاری تعلیم دی فراہمی یقینی بنا رہے آں، سکولاں وچ کلاس رومز دی کمی نوں جلدی دور کر دِتا جائے گا، آئی ٹی ، سائنس لیبز تے لائبریریزی دی اپ گریڈیشن کر رہے آں۔
تفصیل دے مطابق بدھ نوں’ وزیر اعظم تعلیمی اصلاحات ‘پروگرام دے حوالے نال سکولاں نوں جدید بساں دی فراہمی دی تقریب نال خطاب کردے ہوئے مریم نواز شریف نے آکھیا کہ جدوں اسیں پرائم منسٹر ریفارم پروگرام شروع کیتا تے ایس حوالے نال مختلف سکولاں دا دورا وی کیتاتے ایس دوران سانوں خاص کر سوانیاں ولوں دسیا گیا کہ سانوں بساں دی لوڑ اے، پرائیویٹ ٹرانسپورٹ وچ اسیں محفوظ نہیں آں۔
اوہناں دا کہنا سی کہ جدوں میں ایس حوالے نال وزیر اعظم توں درخاست کیتی تے اوہناں نے اگلے دن بساں دی منظوری دے دِتی۔اوہناں نے آکھیا کہ ایس پروگرام دے تحت اسلام آباد وچ سکولاں لئی ٹرانسپورٹ دیاں سہولتاں نوں بہتر بنان لئی 200بساں فراہم کیتیاں جا رہیاں نیں، پہلے مرحلے وچ 70بساں آ گئیاں نیں۔ اوہناں نے آکھیا کہ سکولاں وچ کلاس رومز دی کمی نوں جلدی دور کر دِتا جائے گا، سکولاں وچ ٹوائلٹس نوں ٹھیک کیتا اے، سکولاں دی حفاظت لئی چار دیواری وی بنائی گئی ۔
اوہناں نے آکھیا کہ ہور سکولاں نوں وی محفوظ بنایا جا رہیا اے۔ اوہناں نے آکھیاکہ معیاری تعلیم دی فراہمی نوں یقینی بنان رہے آں، آئی ٹی ، سائنس لیبز تے لائبریریز دی اپ گریڈیشن کر رہے آں۔ اوہناں نے آکھیا کہ وفاقی دارالحکومت اسلام آباد وچ جدوں سکولاں دی اپ گریڈیشن مکمل ہووے گی تے پرائیویٹ تے سرکاری سکولاں وچ فرق نہیں رہوے گا کیونکہ چنگی تعلیم دینا حکومت دی ذمے واری اے۔ اوہناں نے آکھیا کہ جدوں 2018وچ اپنا اقتدار پورا کر کے جاواں گے، پورے اسلام آباد وچ نویں سکول تے نواں ایجوکیشن سسٹم دے کے جاواں گے۔ اوہناں نے آکھیا کہ مسلم لیگ (ن) سکولاں وچ معیاری تعلیم تے سکولاں دی بہتری لئی کم کر رہی اے۔
