اسلام آباد(پاکستان پوائنٹ نیوز10۔جنوری2017ء) وزیر اعظم محمد نواز شریف نے وفاقی دارالحکومت وچ پشاور موڑ توں نیو اسلام آباد ائر پورٹ تک نویں میٹرو بس دی فوری اُساری دی ہدایت کیتی اے جدکہ اوہ 14اگست نوں نویں اسلام آباد ائر پورٹ دے نال نال نویں میٹرو بس سروس دا افتتاح وی کرن گے۔ وزیر اعظم نال سیکرٹری مواصلات ڈویژن تے چیئرمین این ایچ اے شاہد اشرف تارڑ نے منگل نوں وزیر اعظم ہاﺅس وچ ملاقات کیتی، ملاقات دوران اوہناں نے وزیر اعظم نوں ملک وچ جاری سڑکاں بنان دے منصوبیاں اُتے پیشرفت بارے دسیا۔
ایس موقعے اُتے وزیر اعظم نے آکھیا کہ ملک دی اجتماعی سماجی و اقتصادی ترقی ،دور دے علاقیاں نوں سڑکاں راہیں آپس وچ ملان نال اے جدکہ ایس نتیجے وچ معاشی سرگرمیاں لئی وڈے اقتصادی موقعے وی پیدا ہون گے۔ وزیر اعظم نے پشاور موڑ نوں نیو اسلام آباد ائر پورٹ نال ملان والی اسلام آباد میٹرو بس لنک دی فوری اُساری دی وی ہدایت کیتی۔ وزیر اعظم نوں دسیا گیا کہ ایس منصوبے اُتے تقریبن 18ارب رُپئے لاگت آئے گی تے ایس روٹ اُتے 14بس سٹاپس ہون گے۔
وزیر اعظم 14اگست نوں نویں اسلام آباد ائر پورٹ دے نال نال نویں میٹرو بس سروس دا وی افتتاح کرن گے جہدے نتیجے وچ مسافر سکون نال سفر کرن دے نال نال اپنا قیمتی ویلا وی بچا سکن گے۔ وزیر اعظم نے ہدایت کیتی کہ نویں اسلام آباد ائر پورٹ لئی میٹرو بس سروس جدید ترین سہولتاں نال آراستہ ہونی چاہیدی تے اوہدے کم تے خدمتاں اُتے قطعی طور اُتے کوئی سمجھوتا نہیں کیتا جانا چاہیدا۔ ملاقات وچ وزیر اعظم دے سیکرٹری تے ہور حکام وی موجود سن۔
