اسلام آباد(پاکستان پوائنٹ نیوز09۔جنوری2017ء) پاناما کیس دی سنوائی دے دوران سپریم کورٹ دے جسٹس آصف سعید کھوسہ نے ریمارکس دِتے کہ جائیداداں جے قطر ی دیاں نیں فیر تے پیسیاں دی منتقلی دا سوال ای ختم ہو جاندا اے، نواز شریف تے اوہناں دے بالاں وچکار تحفےاں دے وٹاندرے دا ثبوت وی منگ سکدے آں۔تفصیل دے مطابق سپریم کورٹ دے جسٹس آصف سعید کھوسہ دی سربراہی وچ جسٹس اعجاز افضل خان، جسٹس گلزار احمد، جسٹس شیخ عظمت سعید تے جسٹس اعجاز الحسن اُتے مشتمل پنج رکنی بنچ نے امیر جماعت اسلامی پاکستان سینیٹر سراج الحق، چیئرمین تحریک انصاف عمران خان، سربراہ عوامی مسلم لیگ شیخ رشید احمد تے طارق اسد ایڈووکیٹ ولوں وزیر اعظم نواز شریف تے اوہناں دے خاندان دے بندیاں دیاں آف شور کمپنیاں بارے تحقیقات لئی دائر درخاستاں اُتے سنوائی کیتی۔
سنوائی دے شروع وچ جسٹس آصف سعید کھوسہ نے نعیم بخاری دی تعریف کردے ہوئے آکھیا کہ اوہناں دی مدد بہت چنگی رہی، نعیم بخاری نے دلائل دے شروع وچ آکھیا کہ 15نومبر نوں قطری خط عدالت وچ پیش کیتا گیا پر وزیر اعظم نے اپنے خطاب وچ عدالتی جواب وچ قطری خط تے سرمایا کاری دا ذکر نہیں کیتا۔ اوہناں نے آکھیا کہ جدہ تے دبئی وچ سرمایاکاری دا پورا ریکارڈ موجود اے پر جدہ فیکٹری دا ریکارڈ ہن تیکر عدالت وچ پیش نہیں کیتا۔
جہدے اُتے جسٹس اعجاز افضل نے پُچھیا کہ کیہ ضروری سی کہ وزیر اعظم اپنے دفاع دا ہر نکتہ پارلیمنٹ وچ بیان کردے۔ جدوں کاروبار میاں شریف کردے سن تے کیہ بالاں دی ذمے واری اے کہ منی ٹریل دین؟جسٹس اعجاز الحسن نے ریمارکس دِتے کہ جائیداداں جے قطری دیاں سن تے منی ٹریل شریف خاندان کویں دے سکدا اے۔ تُسیں کیویں آکھ سکدے اوہ کہ نواز شریف نے پیسا باہر گھلیا۔
جہدے اُتے نعیم بخاری نے آکھیا کہ میاں شریف کول قطر لئی سرمایا کاری ای نہیں سی۔ جسٹس عظمت سعید نے ریمارکس دِتے کہ شریف خاندان نے آف شور کمپنیاں 1993توں لنک کرن دا کوئی ثبوت نہیں دِتا، اوہناں نے آف شور کمپنیاں 2006توں مَنیاں نیں۔ جسٹس آصف سعید نے ریمارکس دِتے، جے جائیداداں قطری نیں تے پیسیاں دی منتقلی دا سوال ای ختم ہو جاند ااے۔ دبئی قطر تے لندن دا سارا سرمایا 2004تیکر میاں شریف دا سی۔
نعیم بخاری نے آکھیا کہ مریم نواز وزیر اعظم دے کفالت ہیٹھ نیں تے اوہناں نوں ثابت کرن لئی بتھیرے ثبوت موجود نیں۔ مریم نے مَنیا اے کہ اوہناں دا کوئی ذاتی گھر نہیں، اوہناں نے اپنے گوشواریاں وچ ٹیکس آمدنی صفر ظاہر کیتی تے 35لکھ دی بی ایم ڈبلیو گڈی اک سال وچ دو کروڑ 90لکھ دی ہوگئی۔ جسٹس اعجاز افضل خان نے ریمارکس دِتے کہ حدیبیہ ملز کیس وچ مریم تے حسین فریق نہیں سن، جہدے اُتے نعیم بخاری نے آکھیا کہ 1997وچ مریم نواز تے حسین نواز حدیبیہ پیپرز ملز وچ ڈائریکٹر سن۔
مریم نواز نے اپنے والد کولوں 86کروڑ رُپئے بطور تحفہ لئے، ایس توں وکھ مریم نواز نے اپنے بھرا توں وی قرضا لیا ہویا اے، مریم نواز دے شوہر دا 2013توں پہلے ٹیکس نمبر ای نہیں سی، جہدی آمدن صفر ہووے اوہ بیوی دی کفالت کیویں کر سکدا اے۔ وزیر اعظم نے آکھیا کہ میرا پُتر حسین نواز باہرلے ملک رہندا اے تے اوہنے 81کروڑ رُپئے تحفے دے طور اُتے دِتے، نواز شریف نے 81کروڑ دے تحفے والی رقم اُتے ٹیکس نہیں دِتا، ایف بی آر نے سستی وکھاندے ہوئے وزیر اعظم توں تفتیش نہیں کیتی، حسین نواز دی آمدنی دا وسیلا کیہ اے جو اوہنے 81کروڑ رُپئے تحفے دے طور اُتے دِتے۔
نامعلوم آمدنی دے وسیلے جانے بغیر کیس نوں اگانہ لیجانا مشکل ہووے گا۔ جسٹس شیخ عظمت سعید شیخ نے ریمارکس دِتے کہ بخاری صاحب تہاڈے مطابق مریم نواز نے یوٹیلیٹی بلز وی جمع نہیں کرائے، قرضے دا وڈا حصہ نامعلوم وسیلیاں توں لیا گیا، نامعلوم وسیلے کون نیں اوہ مخالف فریق نوں دَسنے ہون گے۔ جسٹس شیخ عظمت سعید نے پُچھیا کہ کیہ تحفہ دین والے دا نیشنل ٹیکس نمبر ہوندا اے تے نیشنل ٹیکس نمبر حسین نواز پیش کر چکے نیں؟ جہدے اُتے نعیم بخاری نے آکھیا کہ حسین نواز جدوں باہرلے ملک چلے گئے تے اوہناں دا این ٹی این نمبر غیر فعال ہو گیا۔
