لاہور(پاکستان پوائنٹ نیوز07۔جنوری2017ء) صوبائی دارالحکومت لاہور دے علاقے نواب ٹاﺅن توں اغواہون والے نکے بھین تے بھرا دے کیس دا ڈراپ سین ہو گیا، بالاں دے حقیقی پیو نے 50ہزار رُپئے دے بدلے بالاں نوں ویچ کے اغوا دا ڈراما کیتا۔ دسیا گیا اے کہ پیو نے اک ورھے پہلاں اپنے دو بال 50ہزار وچ ویچ کے ڈراما کیتا کہ اوہدے بالاں نوں شیخ کرامت ناں دے بندے نے اغوا کر لیا اے۔
پولیس نے اہم ثبوت تے مقدمے دے مدعی نوں تفتیش وچ شامل کیتا تے اصل وجہ ساہمنے آئی۔بالاں نے دسیا کہ اوہناں دے والد نے کسے دے گھر کم کرن گھلیا تے فیر اک سال تیکر اوہ اوتھے رہے۔ بالاں دے والد نے جھوٹھا مقدما درج کران دا اعتراف وی کیتا اے۔ پولیس دے مطابق شیخ کرامت ناں دے بندے نوں بلیک میل کرن لئی ملزم نے بالاں نوں اونے پونے پیسیاں وچ ویچیا۔ پولیس نے بالاں نوں ساہیوال توں بازیاب کرا کے ملزم خلاف قانونی کارروائی شروع کر دِتی اے۔
