لاہور(پاکستان پوائنٹ نیوز04۔جنوری2017ء) صوبائی راجدھانی وچ کلمہ چوک دے نیڑے احتجاجی وکھالے دے نتیجے وچ ٹریفک دا نظام ڈاڈھی طرحاں متاثر ہویا اے، گجومتہ توں کلمہ چوک تیکر میٹرو بس سروس وی بند کر دِتی گئی۔ ٹریفک پولیس نے ٹریفک دا نظام بحال کروان لئی پنجاب پولیس دی بھری نفری تے واٹر کینن سَد لئی۔ پولیس نے کلمہ چوک وچ وکھالویاں نوں گرفتار کرنا وی شروع کر دِتا اے۔
سکیورٹی اداریاں نے وکھالویاں نوں روکن لئی فیروز پور روڈ اُتے ارفع کریم ٹاور کول کنٹینر لا دِتے نیں۔ دوجے پاسے احتجاج پاروں فیروز پور روڈ، لبرٹی، گلبرگ، مسلم ٹاﺅن تے برکت مارکیٹ نال جُڑیاں سڑکاں تے دُکاناں بند کروا دِتیاں گئیاں نیں۔ سڑکاں بند ہون پاروں گڈیاں دیاں لَمیاں لمیاں لائناں لگ گئیاں نیں۔ کلمہ چوک وچ وکھالویاں خلاف کارروائی لئی 2ایس پی، 10ڈی ایس پی، 25انسپکٹر تے 1600اہلکار سَد لئے گئے نیں جدکہ ٹریفک پولیس نے ہدایت کیتی اے کہ شہری دَسے گئے دوجے رستیاں توں منزل ول جان۔
