میانوالی(پاکستان پوائنٹ نیوز28۔دسمبر2016ء) وزیر اعظم میاں محمد نواز شریف نے چشمہ تھری نیو کلیئر پاور پلانٹ دا افتتاح کر دِتا۔ تفصیل دے مطابق وزیر اعظم میاں محمد نواز شریف میانوالی پہنچے ، جتھے اوہناں دے نال وفاقی وزیر مملکت برائے پانی و بجلی عابد شیر علی، وفاقی وزیر دفاع خواجا آصف تے مشیر خارجا سرتاج عزیز سنے پاکستان اٹامک انرجی کمیشن دے چیئرمین محمد نعیم وی موجود سن۔
منصوبے دے افتتاح توں پہلے وزیر اعظم نوں پلانٹ منیجر ریاض خالق انصاری نے منصوبے بارے بریف کیتا۔ وزیر اعظم نوں دسیا گیا کہ ایہ منصوبا چائنا نیشنل نیو کلیئر کارپوریشن تے پاکستان اٹامک انرجی کمیشن دے سانجھے تعاون نال پورا کیتا گیا اے جو ملک وچ بجلی دی کمی اُتے قابو پان وچ مدد دیوے گا، وزیر اعظم نوں دسیا گیا کہ چشمہ ون تے چشمہ ٹو پراجیکٹ دے کامیاب آپریشن دے بعد ایہ تیجا منصوبا اے۔
چشمہ نیوکلیئر پاور دا منصوبا 2017وچ مکمل ہووے گا،چشمہ تھری نیو کلیئر پاور پلانٹ توں 340میگا وا بجلی نیشنل گرڈ وچ شامل ہووے گی۔ چشمہ تھری منصوبا چین دے تعاون نال بنایا جا رہیا اے۔ منصوبے دی افتتاحی تقریب نال خطاب کردے ہوئے وزیر اعظم میاں محمد نواز شریف نے آکھیا کہ اسیں اپنی حکومت وچ لوڈشیڈنگ ختم کراں گے۔ اوہناں نے آکھیا کہ منصوبا نیو کلیئر سائنس و ٹیکنالوجی دا مونہ بولدا ثبوت اے۔
وزیر اعظم دا کہنا سی کہ پاکستان تے چین دی دوستی خطے وچ ترقی دیاں نویاں راہواں کھل رہیاں نیں، دوویں ملکاں دی دوستی تے تعاون لوکائی تے خطے لئی اک چنگی اے۔ اوہناں نے دعوا کیتا کہ چشمہ 4پراجیکٹ مِتھے ویلے توں پہلے چالو ہو جائے گا جدکہ ٹو تے تھری پاور پلانٹس نوں مکمل کرن نال دوویں ملکاں دے آپسی تعلقات ہور پکے ہون گے۔اوہناں دا کہنا سی کہ کے ٹو تے تھری توں 2200میگا واٹ بجلی پیدا ہووے گی، منصوبے اُتے تیزی نال کم جا ری اے، کے ٹو تے کے تھری منصوبے 2030تیکر مکمل کر لئے جان گے۔
وزیر اعظم نواز شریف دا کہنا سی کہ چین نال پہلے نیو کلیئر پاور پلانٹ دا سمجھوتا ساڈے دور وچ ہویا سی، چشمہ وچ چلن والے نیو کلیئر پاور پلانٹس ہور پلانٹس توں کیتے بہتر نیں۔ اوہناں نے آکھیا کہ کینپ دی ڈیزائن لائف 2002وچ مکمل ہوئی سی تے اوہ منصوبا اج وی بجلی پیدا کر رہیا اے، سانوں ملکی وسائل نال کینپ وچ محفوظ نیو کلیئر پاور پلانٹ چلان اُتے خشی اے۔
اوہناں دا کہنا سی پاکستان اٹامک انرجی کمیشن ایٹمی ایندھن دی پیداوار لئی کم کر رہی ااے۔ وزیر اعظم نے آکھیا کہ ملک توں لوڈشیڈنگ دا خاتما پہلی ترجیح اے ۔اسیں ملک توں لوڈشیڈنگ دے خاتمے لئی پرعزم آں۔ اوہناں نے اعلان کیتا کہ2018دے آخیر تیکر بجلی دی لوڈشیڈنگ ختم ہو جائے گی۔ وزیر اعظم نے آکھیا کہ ترقی لئی توانائی دے وڈے منصوبے ضروری نیں، پاکستان اٹامک انرجی کمیشن ملک وچ منصوبیاں اُتے تیزی نال کم کر رہیا اے، پی این آر اے اپنا کم چنگے طریقے نال کر رہیا اے، پاکستان اٹامک کمیشن نوں نیو کلیئر پاور پلانٹس دی حفاظت اُتے بھرپور نظر رکھنی پئے گی جہدے لئی حکومت ہر قسم دا تعاون تے مدد دیوے گی۔
اوہناں نے آکھیا کہ پاکستان تے چین سی پیک وچ ساجھے دار نیں۔ پاکستان تے چین مختلف منصوبیاں اُتے کم کر رہے نیں، سی پیک دی وجہ توں پاک چین دوستی ہور پکی ہوئی۔ وزیر اعظم نے آکھیا کہ گوادر وچ نواں ائر پورٹ بنا رہے آں، چین دے تعاون نال سڑکاں تے ریلوے لنگس بنائے جا رہے نیں۔ اوہناں دا کہنا سی کہ چینی کمپنیاں نوں پاکستان نیو کلیئر پلانٹس لان دی پیشکش کرنا واں، وزیر اعظم نے چشمہ پراجیکٹ اُتے کم کرن والے بندیاں لئی دو مہینیاں دے بونس دا اعلان وی کیتا۔
وزیر اعظم نے آکھیا کہ قوم نال لوڈشیڈنگ دے خاتمے دا وعدا پورا کرن لئی اسیں ہور کم کر رہے آں، منصوبیاں نوں مکمل کرن دے بعد بجلی دی لوڑ پوری ہون دے نال نال بجلی سستی وی ہووے گی، سستی بجلی نال پیداواری لاگت گھٹ ہووے گی۔ وزیر اعظم دا کہنا سی کہ ملک وچ سڑکاں بنن گیاں تے لوک اک دوجے دے نیڑے آن گے، جدوں دوریاں ختم ہون گیاں تے ترقی ہور تیز ہووے گی۔
اوہناں دا کہنا سی کہ نویں منصوبیاں نال روزگار دے موقعے وی پیدا ہون گے، بے روزگاری ختم ہووے گی تے دہشت گردی وی ختم ہو جائے گی۔ مخالفاں اُتے تنقید کردے ہوئے وزیر اعظم نے آکھیا کہ پاکستانیاں اُتے رحم کرو، مخالف ترقی وچ ہتھ ونڈان تے دھرنے نہ دین، کیوں جے دھرنیاں توں کجھ نہیں ملن والا۔ وزیر اعظم دا ہور کہنا سی کہ بغیر وجہ احتجاج دا کوئی فائدا نہیں، شیواں ٹھیک ہو رہیاں نیں تے اوہدے وچ اوکڑاں نہ پاﺅ۔
