کراچی(پاکستان پوائنٹ نیوز22۔دسمبر2016ء) سابق صدر آصف علی زرداری تقریبن ڈیڈھ سال بعد کل اُچیچی اُڈان دے ذریعے دبئی توں کراچی پہنچن گے، پیپلز پارٹی نے آصف علی زرداری دا چاہواں نال استقبال دیاں تیاریاں مکمل کر لئیاں نیں جدکہ ایس موقعے اُتے سکیورٹی دے وی فول پروف انتظامات کیتے گئے نیں۔ آصف علی زرداری 25جون 2015نوں انے گھر والیاں نال اچانک دبئی ٹُر گئے سن تے باہرلے ملک رہن دے دوران اوہ لندن تے امریکا وی گئے۔
پیپلز پارٹی ولوں آصف علی زرداری دی پچھلے ورھے بے نظیر بھٹو دی ورسی دے موقعے اُتے واپسی دا اعلان کیتا گیا پر بعد اوہناں دی واپسی نہ ہوئی تے ہن تقریبن ڈیڈھ سال مگروں آصف زرداری جمعے دے دیہاڑے اُچیچے جہاز راہیں کراچی ائر پورٹ دے اولڈ ٹرمینل اُتے پہنچن گے جتھے پارٹی دی اعلا قیادت دے نال مرکزی و صوبائی رہنما اوہناں دا استقبال کرن گے۔ ایس سلسلے وچ پنجاب سنے ملک بھر توں پارٹی دے مرکزی و صوبائی رہنما آصف علی زرداری دے استقبال لئی کراچی پہنچنا شروع ہو گئے نیں۔
آصف علی زرداری جمعے نوں ملک واپسی دے بعد اولڈ ٹرمینل نال جُڑی سڑک اُتے جلسے نال خطاب وی کرن گے۔ وسیلیاں دے مطابق آصف علی زرداری 27دسمبر نوں بے نظیر بھٹو دی ورسی دی تقریب وچ رلت کرن گے تے آئندا دے لائحہ عمل دا وی اعلان کیتا جائے گا۔ وسیلیاں دے مطابق حکومت ویکھن وچ پیپلزپارٹی دی قیادت ولوں 27دسمبر نوں کسے وی متوقع اعلان توں ڈری ہوی نہیں لگ رہی پر آصف علی زرداری دی ملک واپسی تے آئندا دے لائحہ عمل دا باریکی نال جائزا لین لئی مکمل تیاری کر چکی تے اوہدے بعد ای آئندا دی منصوبا بندی شروع کیتی جائے گی۔
