سوشل میڈیا اُتے سٹریٹ چائلڈ تے کتے دی دل نوں موہ لین والی تصویر وائرل

کراچی(پاکستان پوائنٹ نیوز21۔دسمبر2016ء) سوشل میڈیا اُتے کراچی دیاں سڑکاں اُتے پھرن والے اک سٹریٹ چائلڈ تے اوہدے نال موجود کتے دی دل نوںموہ لین والی تصویر وائرل ہوئی جہدے بعد کراچی دے ای اک واسی محمد بلال نے اوس بال تے اوہدے ساتھی کتے لئی چیریٹی فنڈ اکٹھا کرنا شروع کر دتا۔ تفصیل دے مطابق ایس تصویر وچ اک سٹریٹ چائلڈ نوں اک کتے دے نال کھلوتے ویکھیا گیا،پر جو گل سوشل میڈیا اُتے ورتیندڑاں دے دِلاں نوں لگی اوہ ایہ سی کہ اوس بال دے پیراں وچ جُتیاں نہیں سن پر اوہنے اپنے ساتھی کتے نوں ٹھنڈ توں بچان لئی اک اپنا سویٹر پوایا ہویا سی۔ ایس تصویر نے سوشل میڈیا اُتے کئی ورتیندراں نوں رُو ادِتا پر ایہ تصویر لین والے اک بلال نامی بندے، جو کہ فلم میکر تے سٹریٹ فوٹو گرافر وی اے، نے اوس بال تے اوہدے کتے نوں بہتر شیواں کھوان تے پناہ دین لئی فنڈ اکٹھا کرنا شروع کر دِتا اے جہدے لئی اک سائٹ ’گوفنڈ می‘ اُتے پیسے جمع کروائے جا سکدے نیں۔اپنی فیس بک پوسٹ اُتے بلال نے دسیا کہ میں جدوں ایس بال نوں ویکھیا تے اوہ اوس کتے نوں ’جگو جگو‘ آکھ کے بُلا رہیا سی تے اپنا ناں سُندے ای کتا وی اوس بال ودھدے ہوئے اوہنوں پیار کرن لگ جاندا، جہدے بعد میں اپنے بیلیاں نال رلکے ایس دی بھلائی لئی فنڈ اکٹھا کرنا شروع کر دِتا تے گھٹ ویلے وچ ای میں ایس بال لئی 2ہزار 634ڈالرز اکٹھے کر لئے نیں۔ بلال نے دسیا کہ اکٹھے ہون والے فنڈز نال بال لئی روٹی پانی، رہن دی تھاں تے ہور لوڑارں پوریاں کیتیاں جان گیاں۔ بلال دا کہنا اے کہ جے فنڈ زیادا اکٹھا ہو گیا تے بال دے ناں دا اک بنک اکاﺅنٹ کھلوا دِتا جائے گا۔ بلال نے اپنی سوشل میڈیا پوسٹ وچ ہور آکھیا کہ مہربانی کر کے ایس بال دی مدد کرو، کیوں جے ایہ اک تصویر اوس بال دے جذبات دی عکاس اے تے ساڈے ساریاں لئی اک سبق وی اے۔ ایس بال لئی فنڈ دین والے ایتھے کلک کر سکدے نیں۔