لاہور(پاکستان پوائنٹ نیوز21۔دسمبر2016ء) پاکستان وچ چین تے ترکی ولوں شروع کیتے جان والے ترقیاتی منصوبیاں دے نتیجے وچ دوویں ملکاں دے شہریاں دی ودھدی ہوئی پاکستان آمد پاروں پنجاب دے ائر پورٹس اُتے تعینات امیگریشن عملے نوں چینی تے ترک زبان سکھن دی ہدایت کیتی گئی اے۔ امیگریشن حکام دا کہنا اے کہ ایس عمل دے نتیجے وچ پاکستان آن والے چینی تے ترکی شہریاں دی امیگریشن وچ آسانی پیدا ہووے گی جدکہ ایہدے نال دوویں دوست ملکاں دی لوکائی وچ رابطے وی ودھن گے۔
وسیلیاں توں پتا لگا اے کہ پاک چین اقتصادی راہداری تے ترکی دے مختلف پراجیکٹس دی وجہ توں دوویں ملکاں توں انجینئرز، کاروباری حضرات، ٹیکنوکریٹس تے عام لوکائی دی پاکستان آمد وچ وادھا ہو رہیا اے،جہنوں نظر وچ رکھدے ہوئے ڈائریکٹر ایف آئی اے پنجاب ڈاکٹر عثمان انور نے لاہور ائر پورٹ اُتے تعینات امیگریشن سٹاف نوں چینی تے ترکی زبان سکھن دیاں ہدایتاں جاری کیتیاں، جہدے بعد 60فیصد توں ودھ عملے نے چینی و ترک مسافراں نال بول چول لئی اوہناں دیاں زباناں دے ابتدائی جملے وی سِکھ لئے جدکہ ڈائریکٹر ایف آئی اے نے لاہور دے بعد ملتان، فیصل آباد تے سیالکوت ائر پورٹس اُتے تعینات امیگریشن عملے نوں وی ہدایت کر دتی اے کہ اوہ چینی تے ترکی زبان سکھن تاں جے امیگریشن وچ آسانی رہوے۔
وسیلیاں نے دسیا کہ سٹاف لئی چینی زبان دے ماہراں دیاں خدمتاں حاصل کیتیاں گئیاں نیں جدکہ ترکی زبان سکھن لئی ترکش ائر لائنز دے عملے توں مدد لِتی جا رہی اے۔
