’کوئی جے ویکھ لے کہ جنید جمشید دی فیملی اوہناں کولوں کیہ کروا رہی اے‘

جنید جمشید دے پُتر تیمور جنید نے سوشل میڈیا اُتے اپنے والد دیاں یاداں تازا کر دِتیاں

’کوئی جے ویکھ لے کہ جنید جمشید دی فیملی اوہناں کولوں کیہ کروا رہی اے‘
جنید جمشید دے پُتر تیمور جنید نے سوشل میڈیا اُتے اپنے والد دیاں یاداں تازا کر دِتیاں

لاہور(پاکستان پوائنٹ نیوز19۔دسمبر2016ء) پی آئی اے دی چترال توں اسلام آباد آن والی اُڈان 661ایبٹ آباد دے نیڑے حادثے داشکار ہوئی، حادثے دا شکار ہون والے جہازوچ مشہور مبلغ و نعت خواں جنید جمشید تے اوہناں دی بیوی وی سوار سی۔ جنید جمشید دے پُتر تیمور جنید نے سماجی رابطے دی ویب سائٹ فیس بک اُتے اپنی اک پوسٹ وچ اپنے والد دیاں کئی یاداں تازا کر دِتیاں جہنوں پڑھ ہر کوئی رو پیا۔

تیمور جنید دا کہنا سی کہ دنیا لئی جنید جمشید جو وی سی میرے لئی اوہ میرا والد سی۔ اوہناں نے آکھیا کہ جدوں وی اوہ گھر آﺅندے سن تے اسیں سارے اپنے اپنے کمریاں وچوں نکل کے اوہناں نال چِنبڑن لئی دوڑدے ساں تے اوہناں دے گلے لگ جاندے ساں۔ اسیں کوئی وی گل کرنی ہوندی یاں ملنا ہوندا تے اوہ ہمیشہ ای ساڈے لئی موجود ہوندے سن۔ تیمور نے اک یاد تازا کردے ہوئے لکھیا کہ اسیں لندن وچ موجود ساں تے بارش شروع ہو گئی تے ویڑھے وچ موجود کپڑے گِلے نہ ہو جان ایس لئی میری والدہ نے ابا جی نوں آکھیا کہ اوہ ویڑھے وچوں کپڑے لاہ لین ، جہدے اُتے اوہناں نے آکھیا کہ ’جے کسے نوں پتا چل جائے کہ جنید جمشید دی فیملی اوہناں کولوں کیہ کم کرواندی اے؟ ۔

تیمور نے دسیا کہ اوہناں دا اینا ای کہنا سی کہ اسیں سارے ہسن لگ پئے۔ تیمور نے لکھیا کہ میرے بابا کوئی معمولی انسان نہیں سن، سانوں احساس ہوندا اے کہ اوہ اک عام بندے نہیں سن، اوہناں نے لکھاں لوکاں دے دِلاں وچ گھر کیتا سی۔ تیمور نے لکھیا کہ میرے بابا دے جنازے وچ دنیا بھر توں لوکاں نے رلت کیتی جہناں نے مینوں ایہ احساس دوایا کہ اوہ صرف میرے والد نہیں بلکہ دنیا بھر وچ موجود لکھاں لوکاں لئی وی کُجھ نہ کُجھ سن۔

تیمور نے آکھیا کہ اک وار اوہناں دے کسے بیلی نے پُچھیا کہ کیہ بہت زیادا سفر کرن نال تہاڈے بال تہاڈے اگے شکایت کردے نیں؟ جہدے اُتے ابا جی نے آکھیا کہ میرے کول کم زیادا تے ویلا بہت گھٹ اے۔ تیمور دا کہنا سی کہ اوہناں دے اک بیلی نے مینوں دسیا کہ چترال وچ وی اوہ شہادت دی خاہش کردے سن تے اوہناں نے اللہ دی راہ وچ شہید ہون دی دعاوی کیتی جہدے اُتے اوہناں نے آمین وی کیتا۔ تیمور دی ایس فیس بک پوسٹ نے ہر پڑھن والے نوں رُوا دتا اے۔ ایہدے وچ کوئی شک نہیں کہ جنید جمشید پاکستان دا سرمایا سی، ساڈی دعا اے کہ اللہ اوہناں نوں جنت وچ گھر دیوے۔ آمین!