اسلام آباد(پاکستان پوائنٹ نیوز15۔دسمبر2016ئ) وزیر اعظم محمد نواز شریف نے آکھیا اے کہ دہشت گردی دا لَک ٹُٹ گیا اے، تھوڑی بہت دہشت گردی وی جلدی ختم ہو جاوے گی، ڈرن والے نہیں، ڈٹ کے مشکل حالات دا مقابلا کردے رہواں گے، کراچی دے آپریشن وچ کوئی نرمی نہیں آوے گی، آپریشن اصل منزل تیکر پہنچن تے مطمئن ہون تیکرجاری رہوے گا، موجودا حکومت نوں بہت چیلنجاں دا ساہمنا اے، ماضی وچ مشرف نے کُجھ نہیں کیتا تے پیپلز پارٹی ای کُجھ کر لیندی، اسیں آکے موٹروے نوں لاہور توں اگانہ ودھایا، چاہندے تے فضل الرحمان نال رلکے خیبر پختونخوا وچ حکومت بنا سکدے ساں، دھرنے دین والیاں نوں ایکسپوز کرن لئی حکومت نہیں بنائی، دھرنیاں وچ قوم دا ویلا ضائع کرن توں سوال کرنا قوم دا حق اے، پی پی دے 5ورھیاں دے دور وچ ہر روز کوئی نہ کوئی سکینڈل ساہمنے آﺅندا سی، اج لوک اوہناں نوں ووٹ دین لئی تیار نہیں، ملک وچوں 2018تیکر لوڈشیڈنگ ختم ہو جاوے گی، کراچی تاں حیدر آباد موٹروے اگلے 6مہینیاں وچ مکمل ہو جاوے گی۔
تفصیل دے مطابق جمعرات نوں وفاقی ایوان ہائے صنعت و تجارت دے تحت ایکسپورٹ ایوارڈ تقریب نال خطاب کردے ہوئے وزیر اعظم نواز شریف نے آکھیا کہ بجلی دے بعد دوجا وڈا مسئلا دہشت گردی دا سی، لوڈشیڈنگ ساہمنے دہشت گردی دی لعنت وی ملک اُتے مسلط کیتی گئی، اسیں پہلے مرحلے وچ مذاکرات دی کوشش کیتی، مذاکرات ناکام ہوئے تے آپریشن دا فیصلا کیتا۔ اوہناں نے آکھیا کہ ساڈا ایمان کہندا اے کہ فتنے نوں مِدھ دینا چاہیدا، فتنہ و فساد پیدا کرن والیاں نوں ختم کرنا ثواب دا کم اے، جے ایسے فیصلے نہ کیتے جان تے ملک نہیں چلدے۔
اوہناں نے آکھیا کہ 2013توں پہلے ملک وچ ہر روز دہشت گردی دا کوئی نہ کوئی واقعہ ہوندا سی، ہُن ملک وچ دہشت گرداں دا لَک ٹُٹ گیا اے، ملک وچ جو تھوڑی بہت دہشت گردی اے اوہ وی جلدی ختم ہو جاوے گی، دہشت گردی نوں جَڑوں پُٹنا ساڈے ایمان دا حصہ اے۔ کراچی دے معاملات اُتے گل بات کردے ہوئے وزیر اعظم نواز شریف نے آکھیا کہ کراچی دی صورتحال اوہناں دی حکومت لئی چیلنج سی جہنوں پورا کر رہے آں، بہت حد تیکر کراچی دی صورتحال بہتر ہو گئی اے تاجراں تے لوکاں دا اعتماد واپس آ یا اے۔
نواز شریف نے واضح کردے ہوئے آکھیا کہ کراچی آپریشن وچ کوئی نرمی نہیں آوے گی تے آپریشن اوس ویلے تیکر جاری رہوے گا جدوں تیکر کراچی دے لوکاں نوں ایہ تسلی نہ ہو جائے کہ کراچی دے حالات بہتر ہو گئے نیں۔ وزیر اعظم نے آکھیا کہ صنعتاں دی لوڈشیڈنگ ختم کر دِتی گئی اے، لوکائی لئی 2018تیکر لوڈشیڈنگ ختم کر دیاں گے، اوہناں دی سوچ صرف 2018تیکر نہیں بلکہ ایس توں وی اگانہ اے، اوہناں نے آکھیا کہ 2008توں 2013تیکر ہر روز کرپشن دا اک نواں سکینڈل ساہمنے آﺅندا سی پر اوہناں دی حکومت وچ اج تیکر انج دا کوئی وی سکینڈل ساہمنے نہیں آیا۔
