لاہور(پاکستان پوائنٹ نیوز13۔دسمبر2016ء) لاہور یونیورسٹی آف مینجمنٹ سائنسز(لمز) دے ہاسٹل توں اک پڑھیار دی لاش اوہدے کمرے توں برآمد ہوئی۔ تفصیل دے مطابق پڑھیار تے اُستاداں نوں جاری اک نوٹس وچ یونیورسٹی انتظامیا دا کہنا سی کہ سانوں بہت افسوس تے دُکھ نال ایہ دَسنا پے رہیا اے کہ ساڈے ہاسٹل وچ رہن والا پڑھیار شاہ میر آصف باجوہ فوت ہو گیا اے۔
شاہ میر 12دسمبر نوں اپنے ہاسٹل وچ بیڈ اُتے بے ہوش پیا سی،یونیورسٹی انتظامیا نے اطلاع ملدے ای فوری طور اُتے شاہ میر نوں نیشنل ہسپتال پہنچایا جتھے ڈاکٹراں نے دسیا کہ سویرے ویلے ای شاہ میر فوت ہو گیا اے، انتظامیا ولوں جاری نوٹ وچ ہور دسیا گیا اے کہ شاہ میر دے گھر والیاں نوں اوہدے فوت ہون دی خبر دے دِتی گئی اے تے اوہناں نے درخاست کیتی اے کہ اوہناں دی پرائیویسی دی عزت کیتی جائے۔ مڈھلی رپورٹ دے مطابق شاہ میر ہیروئن دی زیادتی پاروں دل دا دورا پین نال ہلاک ہویا۔ ہسپتال وسیلیاں دے مطابق شاہ میر دا پوسٹمارٹم اج کیتا جائے گا جدکہ شاہ میر دے گھر والے وی کراچی توں لاہور پہنچ گئے نیں۔
