اسلام آباد(پاکستان پوائنٹ نیوز08۔دسمبر2016ء) پاکستان الیکٹرانک میڈیا ریگولیٹری اتھارٹی (پیمرا) نے حویلیاں دُکھانت دیاں غلط تے غیر تصدیق شدا تصویراں چلان اُتے 24چینل نوں نوٹس جاری کر دِتا۔ چینل نوں گھلے گئے نوٹس وچ چینل انتظامیا توں چالو ورھے دی 15تاریخ نوں ایس بارے جواب منگیا گیا اے۔ نوٹس وچ آکھیا گیا اے کہ چینل 24دیاں نشریات پیمرا ایکٹ 2015دے سیکشن 3.8تے 17خلاف سن۔
نوٹس وچ آکھیا گیا کہ چینل نے بریکنگ نیوز دے طور اُتے جہاز وچ ہلاک ہون والے بندیاں دیاں چیخاں وغیرا دیاں آوازاںدا اک ویڈیو کلپ چلایا۔ چینل انتظامیا ایہ ثابت کرے کہ اوہ آڈیو تے ویڈیو پچھلے دیہاڑے حویلیاں دُکھانت وچ پی آئی اے دے تباہ ہون والے جہاز دی سی۔ اپنے نوٹس وچ پیمرا نے مطالبا کیتا اے کہ چینل انتظامیا ایس گل نوں ثابت کرے کہ ایہ ویڈیو اوسے تباہ ہوئے جہاز دی اے تے ہور ایہ وی دسیا جائے کہ ایہ ویڈیو جہاز توں باہر کیویں آئی جدکہ ایس بارے جواب نہ دین دی صورت وچ چینل نوں 10ملین تیکر جرمانا ہون دے نال نال چینل دا لائسنس وی منسوخ کیتا جا سکدا اے۔
