اسلام آباد(پاکستان پوائنٹ نیوز07۔دسمبر2016ء) ملک بھر وچ پاناما دا ہنگاما اپریل توں شروع ہویا تے ایس معاملے توںہر بندا واقف اے۔پاناما لیکس وچ حکمران جماعت دے سربراہ دے خاندان دا ناں آنا تے اوہناں بارے سپریم کورٹ وچ کیس چلنا تے اک عام جہی گل اے پر پاناما کیس وچ اک مزدور فضل خان دا ناں وی شامل اے۔ فیڈرل بورڈ آف ریونیو (ایف بی ار) نے فضل خان نوں کئی وار ٹیکس گوشورایاں بارے نوٹس گھلیا اے۔
فضل خان کئی دوجے پاکستانیاں دی طرحاں محنت مزدوری کردا اے جدکہ فضل خان دی مہینہ وار آمدن 17ہزار رُپئے اے۔ فضل خان نوں ایف بی آڑ ولوں کئی وار نوٹس گھلے گئے نیں جدکہ اوہدا کہنا اے کہ اوہنوں پاناما دا پتا ای نہیں کہ پاناما شے کیہ اے جدکہ ایف بی آر ولوں جاری نوٹس وچ آکھیا گیا اے کہ مسٹر فضل ، تہاڈا ناں پاناما پیپرز وچ اے ایس لئی اپنی جائیداد تے ٹیکس گوشواریاں بارے جواب جمع کراﺅ۔
میڈیا رپورٹ دے مطابق فضل خان اپنے گھر والیاں نال اک عام زندگی لنگھا رہیا اے تے اوہ پچھلے 14ورھیاں توں مزدوری کر رہیا اے جدکہ اوہدی مہینہ وارآمدن 17ہزار رُپئے اے جہدے نال اوہ اپنا تے اپنے گھر والیاں دا ڈھڈ بھردا اے۔ میڈیا اُتے فضل خان دی خبر آن دے بعد ایف بی آر بارے کئی سوال ساہمنے آئے نیںکہ کیہ ایف بی آر بغیر تحقیقات کیتے ای کسے نوں وی نوٹس گھل دیندا اے؟
