لاہور(پاکستان پوائنٹ نیوز07۔دسمبر2016ء) جسٹس شمس محمود مرزا نے شہری فیصل نصیر دی درخاست اُتے سنوائی کیتی، درخاست گزار نے موقف اختیار کیتا کہ نواز شریف تے شہباز شریف دوویں رلکے ملک وچ کرپشن کر رہے نیں، سرکاری اداریاں وچ من پسند بندیاں نوں نوازیاجا رہیا اے تے نااہل لوکاں نوں تعینات کر کے کرپشن کیتی جا رہی اے، پنجاب دے ہر سرکاری محکمے وچ کرپشن دیاں شکایتاں آ رہیاں نیں، بے نظیر انکم سپورٹ پروگرام دے ڈھائی سو ارب رُپئے دا کوئی حساب کتاب موجود نہیں اے، کرپشن دی بنیاد اُتے وزیر اعظم نواز شریف تے وزیر اعلا پنجاب میاں شہباز شریف آئین دے آرٹیکل 62، 63 اُتے پورا نہیں اُتردے ایس لئی اوہناں نوں نااہل قرار دِتا جائے۔
درخاست گزار دا ہور کہنا سی کہ رجسٹرار آفس نے درخاست سنوائی جوگ نہ ہون تے وزیر اعظم تے وزیر اعلا نوں استثنی حاصل ہون دا اعتراض لایا اے جہدا کوئی جواز نہیں بندا، اعتراض ختم کر کے درخاست نوں سنوائی جوگ قرار دِتا جائے۔ عدالت نے مڈھلے دلائل سنن دے بعد اعتراض ختم کردے ہوئے درخاست نوں سنوائی جوگ قرار دے دِتا، عدالت نے رجسٹرار آفس نوں ہدایت کیتی کہ اوہ درخاست نوں کسے مناسب بنچ دے ساہمنے مڈھلی سنوائی لئی پیش کرے۔
