دھرنے وچ امپائر دی اُنگل جنرل راحیل دی اُنگل ہرگز نہیں سی: جنرل (ر) عبدالقادر بلوچ

اسلام آباد(پاکستان پوائنٹ نیوز28۔نومبر۔2016ء) جنرل (ر) عبدالقادر بلوچ نے آکھیا اے کہ دھرنے وچ امپائر دی انگل جنرل راحیل شریف دی انگل ہرگز نہیں سی۔ تفصیل دے مطابق نجی ٹی وی چینل دے اک پروگرام وچ گل بات کردے ہوئے اوہناں نے آکھیا کہ آرمی اک ایسا ہائی پروفائل ادارا اے جہدے بارے بتھیرے لوک ایہ تاثر دین دی کوشش کردے نیں کہ اوہ ایس ادارے تے ایہدے وچ موجود بندیاںدے بہت نیڑے نیں۔ اوہناں دا کہنا سی کہ عمران خان دے دھرنے وچ عمران خان ولوں دَسی گئی امپائر دی انگل ہرگز جنرل راحیل شریف دی انگل نہیں سی، ایس سارے معاملے وچ کُجھ ریٹائر لوکاں سنے جنرل پرویز مشرف وی شامل سی، ایہناں بندیاں دی سول گورنمنٹ نال ڈاڈھی ناراضگی سی۔ اوہناں نے آکھیا کہ جنرل (ر) پرو یز مشرف بارے کُجھ لوکاں نے عمران خان تے طاہر القادری نوں غلط تاثر دِتا کہ راحیل شریف انگل چُکن گے جدکہ ایہ لوک اوہناں نال جھوٹھ وی بولدے ہون گے۔ عبدالقادر بلوچ نے آکھیا کہ میں صرف جنرل راحیل شریف دی گواہی دینا واں کہ سیاسی نظام بارے راحیل شریف دے ارادے کدی غلط نہیں رہے جدکہ میں دوجیاں بارے کُجھ نہیں آکھدا۔ اوہناں نے آکھیا کہ آرمی چیف دی اپنی اک ٹیم ہوندی اے جہدے وچ کور کمانڈرز وغیرا شامل ہوندے نیں پر میں صرف جنرل راحیل شریف دی گواہی دینا وا کہ کسے وی ویلے اوہناں دے ذہن وچ کوئی ایسی گل نہیں سی کہ اوہ انگل چُکن گے۔