کراچی(پاکستان پوائنٹ نیوز19۔نومبر۔2016ء) آل پاکستان مسلم لیگ دے سربراہ تے سابق صدر جنرل (ر) پرویز مشرف نے آکھیا اے کہ کسے بندے نوں حق نہیں پہنچدا کہ میرے اکاﺅنٹس دیاں میرے کولوں تفصیلاں پُچھے، جے پیسے دا کرپشن نال تعلق اے تے میں جواب دیاں گا، پر میں اپنے کسے نجی سرمائے دیاں تفصیلاں دین دا پابند نہیں آں، میں اپنے خون پیسنے دی کمائی دا حساب نہیں دیواں گا۔
نجی ٹی وی نال گل بات کردے ہوئے سابق صدر نے آکھیا کہ میں دنیا بھر وچ لیکچرز دے کے پیسے کمائے، میں 45منٹ لیکچر دین دے ڈیڈھ لکھ ڈالر لینا واں، اک سوال دے جواب وچ اوہناں نے آکھیا کہ سعودی عرب دے سابق فرمانروا شاہ عبداللہ نے میرے اکاﺅنٹ وچ پیسے جمع کروائے۔ نومبر 2009وچ میرے اکاﺅنٹ وچ جمع کرائے گئے پیسیاں دا اکاﺅنٹ اجے وی بند نہیںہویا، اوہناں نے آکھیا کہ مینوں صحت دیاں پیچیدگیاں ضرور نیں پر ایہدا مطلب ایہ نہیں کہ میں بالکل ای ہل جل نہیں سکدا، میں بالکل ٹھیک ٹھاک آں تے باقاعدگی نال ورزش کرنا واں۔
اوہناںد ا کہنا سی کہ میں پاستان واپس آنا چاہنا واں، حالات کُجھ بہتر ہو جان تے میں ضرور پاکستان آواں گا۔ اوہناں نے آکھیا کہ میرے اُتے سیاسی مقدمے بنائے گئے نیں، ہن تیک شفاف ٹرائل نہیں ہو رہیا، جے ہو رہیا ہوندا تے ہن تیک کیس ختم ہو جاندے۔
