لاہور(پاکستان پوائنٹ نیوز17۔نومبر۔2016ء) سابق گورنر پنجاب چودھری محمد سرور نال ملاقات وچ پیپلز پارٹی تے (ن) لیگ دے وکیلاں نے ساتھیاں سنے تحریک انصاف وچ رلت دا اعلان کر دِتا۔تفصیل دے مطابق جمعرات دے دیہاڑے سابق گورنر پنجاب چودھری محمد سرور نال ملاقات کردے ہوئے پیپلز پارٹی دے چودھری محمد عارف سندھو، (ن) لیگ دے چودھری محمد افضل، چودھری نصیر احمد، چودھری نور احمد بھٹا نے اپنے درجناں ساتھیاں سنے تحریک انصاف وچ رلت دا اعلان کیتا جدکہ سید سجاد حیدر شاہ وی ایس موقعے اُتے موجود سن۔
ایس موقعے اُتے گل بات کردے ہوئے چودھری محمد سرور نے آکھیا کہ ملک توں ظلم تے ناانصافی دیاں انھیریاں نوں ختم کر کے ایتھے چانن لیانا چاہندے آں جہدے لئی تحریک انصاف سپریم کورٹ سنے ہر فورم اُتے جنگ لڑ رہی اے تے انشا اللہ فتح حق تے سچ دی ہوووے گی۔ اوہناں نے آکھیا کہ پاکستان وچ آئین و قانون دی حکمرانی قائم ہو جائے تے فیر کسے نوں کرپشن کرن تے لوکائی دے حقاں اُتے ڈاکا مارن دی جرات نہیں ہووے گی۔
اوہناں نے آکھیا کہ جو لوک احتساب دی راہ وچ اوکڑاں پا رہے نیں اوہ اصل وچ ایس ملک تے قوم دی ترقی دے دشمن نیں تے قوم انج دے لوکاں توں اج نہیں تے کل ضرور ووٹاں دی طاقت نال حساب لووے گی۔ اوہناں نے آکھیا کہ بھارتی جارحیت دے جواب وچ آرمی چیف جنرل راحیل شریف دا جرات مندانا موقف پوری قوم دیاں امنگاں دی ترجمانی اے تے ایہدے وچ کوئی شک نہیں کہ ہر محاذ اُتے ہار بھارت دے مقدر وچ لکھی جا چکی اے تے پاکستان اوہدا مونہ توڑ جواب دیندا رہوے گا۔
