اسلام آباد(پاکستان پوائنٹ نیوز15۔نومبر۔2016ء) سپریم کورٹ وچ پاناما لیکس کیس دی سنوائی دے دوران وزیر اعظم نواز شریف دے بالاں دے وکیل اکرم شیخ نے عدالت توں استدعا کیتی کہ اوہ اک ایسا خط پیش کرنا چاہندے نیں جو صرف عدالت لئی اے، جے عدالت مناسب سمجھے تے ایہنوں عام نہ کیتا جائے پر جدوں قطر دے سابق وزیر اعظم تے شہزادے حمد جاسم بن جابر الثانی ولوں لکھیا گیا ایہ خط عدالت دے ساہمنے رکھیا گیا تے فورن ججاں نے ایہدے اُتے سوال چُکنا شروع کر دِتے۔
حمد جاسم نے اپنے خط وچ آکھیا سی کہ اوہناں دے والد دے مرحوم میاں محمد شریف نال پرانے کاروباری تعلقات سن تے کاروبار اوہناں دے وڈے بھرا دے ذریعے چلایا جا رہیا سی۔ خط وچ اوہناں دا کہنا سی کہ دوویں خانداناں وچکار اج وی ذاتی تعلقات نیں۔ حمد جاسم نے لکھیا اے کہ اوہناں نوں دسیا گیا کہ 1980وچ میاں محمد شریف نے الثانی خاندان دے قطر وچ جائیداد دے کاروبار وچ سرمایا کاری دی خاہش ظاہر کیتی۔
میری یاد دے مطابق اوس ویلے دبئی وچ کاروبار دی فروخت دے نتیجے وچ اک کروڑ ویہ لکھ درہم دِتے گئے۔ چیف جسٹس انور ظہیر جمالی نے جواب وچ آکھیا کہ جدوں ایہ خط ریکارڈ اُتے آئے گا تے اپنے آپ عام ہو جائے گا۔ اوہناں نے پُچھیا کہ کیہ ایہ قطر دی شخصیت بطور گواہ عدالت وچ پیش ہو سکے گی؟ تے اکرم شیخ جواب وچ چُپ رہے۔
