اسلام آباد(پاکستان پوائنٹ نیوز15۔نومبر۔2016ء) وزیر اعظم میاں نوازشریف دی صدارت ہیٹھ لائن آف کنٹرول دی صورتحال اُتے جائزا اجلاس ہویا۔ اجلاس وچ مشیر خارجا سرتاج عزیز تے مشیر قومی سلامتی ناصر خان جنجوعہ سنے وزیر اعظم دے اُچیچے معاون طارق فاطمی تے ہور اعلا حکام نے وی رلت کیتی۔ سرتاج عزیز نے اجلاس وچ ایل او سی اُتے بھارتی خلاف ورزیاں بارے رلتیاں نوں بریفنگ دِتی۔
ترجمان وزیر اعظم ہاﺅس دے مطابق حالیا بھارتی خلاف ورزیاں دے نتیجے وچ 26پاکستانی ہلاک جدکہ سوانیاں تے بالاں سنے 107بندے زخمی ہوئے نیں۔ اجلاس وچ بریف کیتا گیا کہ ساڈیاں فوجاں کدی وی فائر وچ پہل نہیں کردیاں، ساڈیاں فوجاں بھارتی جارحیت دا مونہ توڑ جواب دیندیاں نیں، وزیر اعظم نواز شریف دا کہنا سی کہ بھارتی جارحیت اُتے پاکستان ہر ممکن صبرو تحمل دا وکھالا کر رہیا اے۔ ساڈے صبرو تحمل نوں پاکستان دی کمزوری نہ سمجھیا جائے۔ اوہناں نے آکھیا کہ پاکستان کسے وی جارحیت دا مقابلا کرن دی بھرپور صلاحیت رکھدا اے۔
