راولپنڈی(پاکستان پوائنٹ نیوز14۔نومبر۔2016ء) بھارتی فوج دی لائن آف کنٹرول اُتے فائرنگ دے نتیجے وچ پاک فوج دے شہید جواناں دی جہلم وچ نماز جنازہ پڑھی گئی۔ نماز جنازہ وچ آرمی چیف جنرل راحیل شریف نے وی رلت کیتی۔ آئی ایس پی آر دے مطابق آرمی چیف جنرل راحیل شریف نوں سرحدی کمانڈرز نے لائن آف کنٹرول اُتے بھارتی فائرنگ بارے بریفنگ وی دِتی۔ جنرل راحیل شریف نے آکھیا کہ ملک دے دفاع لئی کوئی کسر نہ چھڈی جائے۔
بھارتی فائرنگ دا بھرپور تے موثر جواب دِتا جائے۔ اوہناں نے آکھیا کہ فوج ملکی دفاع لئی ہر ویلے تیار اے۔ یاد رہوے کہ بھمبر سیکٹر اُتے بھارتی فوج نے ایل او سی اُتے سیز فائر دی خلاف ورزی کردے ہوئے انھے واہ فائرنگ کر دِتی، فائرنگ دے نتیجے وچ 7پاکستانی فوجی جوان شہید ہو گئے۔ شہید فوجیاں وچ حوالدار ظفر حسین، ابرار احمد اعوان، لانس نائیک محمد علیم، محمد شوکت، سپاہی پرویز، محمد الیاس تے محمد تنویز شامل نیں۔
