لاہور(پاکستان پوائنٹ نیوز11۔نومبر۔2016ء) علامہ اقبال اوپن یونیورسٹی دے میٹرک دے پرچے وچ انتہائی بے ہودا سوال پُچھے جان دا انکشاف ہویا اے، سماجی رابطیاں دی ویب سائٹس اُتے لوکائی ولوں یونیورسٹی انتظامیا اُتے ڈاڈھی تنقید کردے ہوئے ذمے واراں خلاف کارروائی دا مطالبا کیتا گیا اے۔ تفصیل دے مطابق علامہ اقبال اوپن یونورسٹی ولوں میٹرک دے انگلشن دے پرچے وچ وڈی بھین دی شخصیت اُتے مضمون لکھن دا 15نمبر دا سوال دِتا گیا، پرچے وچ سوال دی تصویر انٹرنیٹ اُتے وائرل ہو گئی جہدے بعد پاکستانی یونیورسٹی انتظامیا نوں ڈاڈھی تنقید دا نشانا بنایا جا رہیا اے۔
پرچے وچ پُچھے گئے سوال دے نال ایہ وی درج کیتا گیا کہ ایہناں مندرجہ ذیل پہلوواں نوں وی تفصیل نال بیان کیتا جائے، جہدے وچ عمر ، جسامت،قد، خوبصورتی تے رویہ شامل اے۔ میٹرک دا امتحان دین والے بالاں دا کہنا اے کہ پرچے وچ ایس قسم دا سوال ویکھ کے اوہ ڈاڈھے پریشان رہ گئے۔ ناں نہ ظاہر کرن دی شرط اُتے اک پڑھیار دا کہنا سی کہ پہلے اوہ سمجھیا کہ ایہ اک غلطی ہو سکدی اے جدوں اوہنے ایس سوال بارے نگران توں پُچھن دی کوشش کیتی تے اوہنے کُجھ وی دسن توں انکار کردے ہوئے پرچے نوں جلدی حل کرن دی ہدایت کیتی۔
دوجے پاسے انٹرنیٹ اُتے لوکائی دی وڈی گنتی نے یونیورسٹی انتظامیا نوں تنقید دا نشانا بناندے ہوئے مطالبا کیتا اے کہ اوہ ذمے واراں خلاف کارروائی کرے۔ پاکستانی لوکائی ولوں آکھیا جا رہیا اے کہ ایہ مضمون انتہائی غیر اخلاقی تے معاشرے دیاں قدراں خلاف اے تے ایہ سوال دین والے اُستاد نوں فوری طور اُتے برطرف کیتا جائے۔ ایس توں وکھ علامہ اقبال اوپن یونیورسٹی دے رجسٹرار ڈاکٹر نعیم قریشی نے ایس معاملے اُتے تحقیقات توں پہلے کسے قسم دی گل بات کرن توں انکار کر دِتا اے۔
